› 選擇地區
三藩市
紐約
洛杉磯
其他美國地區
香港 台灣 北美
 
2013年02月28日

半年蝕4.6億 僅靠慳錢食糊
思捷扭虧路漫長

【本報訊】早前已發盈警的思捷(330),截至去年12月底止中期業績蝕4.65億元,僅符合市場預期的中下限。公司第二季開始(9至12月)銷售進一步惡化,全靠慳錢、削減廣告開支抵銷到部份影響。有分析員相信,思捷下半年度會繼續「睇餸食飯」,惟銷情短期無法扭轉跌勢,扭虧機會渺茫。
記者:吳綺慧

市場原本預期思捷會蝕1.1億至7.3億元不等,今次業績算是屬中下限水平。收入大跌19%至135.6億元,部份是受到去年決定剝離北美業務,以及歐元貶值影響。但即使扣除這些因素,收入都跌8.8%。其中作為重要復蘇指標的同店銷售,由首季的只按年跌0.2%,第二季顯著轉差至跌6%,令市場擔心下半年的業務表現。

下半年銷售回升無望

公司中午公佈業績後,股價即轉升為跌,最多跌過3.5%,及後走勢稍為回順,最後收報10.1元,挫0.8%。
儘管思捷透露,1、2月份的同店銷售跌幅已有改善,但有外資分析員相信,思捷下半年要扭虧的機會渺茫:「首先以歐洲的經濟情況,同埋佢地放慢翻新、轉新貨的速度,下半年銷售要升返基本上唔可能。唯一有好轉嘅係思捷終於肯面對現實,減少燒銀紙,可以減輕到個影響。我估思捷股價唔會再大跌,但短期都唔會有乜catalyst,繼續低位徘徊。」
上任已數個月的執行董行兼行政總裁馬浩思(Jose Martinez)亦表明,會再調較思捷「轉型計劃」。上半年思捷廣告及宣傳只用了約6億元,比起去年度同期、剛聘請巴西超模任代言人時,減少了18%。財務總裁鄧永鏞表示,思捷下半年度會繼續節省開支,希望未來營運開支佔銷售比率可少於50%。不過另一名外資分析員就不睇好:「我估呢個喺長遠目標,一時之間好難cut到咁多,上半年度呢個比率差唔多53%,租金、人工呢啲短期好難大減。」

CEO:新產品難大變化

該分析員又指,思捷減少宣傳開支,亦是「冇得揀」的選擇:「面對現實啦,佢半年就喺經營上淨流出咗11.4億現金,供股的錢都燒唔得好耐,一定要保守返啲。」
至於市場寄予厚望、曾協助思捷走過「黃金10年」的首席產品及設計總監Melody Harris-Jensbach回巢後,新產品將在今個春、夏季登場。不過馬浩思昨日透露產品在消費者角度未必會有很大變化,但批發商反應正面。分析員相信,思捷會是試水溫方式轉型,短期內產品不會有大突破。

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載