› 選擇地區
三藩市
紐約
洛杉磯
其他美國地區
香港 台灣 北美
 
2013年03月05日

好不主席:先到先等 - 盧先亞

某部門女同事有份文件要我簽署,小秘剛巧不在,所以我就叫女同事直接拿到辦公室給我,當我埋頭疾簽,卻見她怔怔望着桌面上的報紙頭版,原本是本報前兩天有關埃及熱氣球的跟進報道。

不敢說閱女無數,有都係年少輕狂的往事,惟歷經職場,觀眉頭眼額都算心中有數,我佯裝漫不經心、輕描淡寫的說了一句:「生死自是有命,人生終究無常。」講完個心不知怎地也揪了一下,然後再緩緩仰首望她,果然中招,兩個都係。只見她嘴抿眼紅,只差沒哭出來;而我無端搞喊一個拎嘢畀我簽嘅女同事,更是瓜田李下。
然此時此刻還是以照顧同事的情緒為先,再問兩句方知慘劇的其中一對年輕罹難夫婦,原來是她認識良久的朋友。自悉噩耗,徹夜難眠,而這幾天縱有千般不願,亦未能置身於無處不在的報道之外,每每念及都不能自已。而我那句「節哀順變」,到了嘴邊又吞回去。
心裏明白,此所謂的安慰話,很多時候不過就是緩和一下傷感氣氛,其實係唔知仲可以講乜嘢,但都要勉強搵啲嘢嚟講。

珍惜與朋友約會時間

其實,我何嘗唔想同呢位同事分享,我亦感同身受。不過個多星期前,小秘傳來一則娛樂新聞,她熟悉我脾性,應知我對八卦消息心存抗拒,明知故犯,我正想發作,才留意到新聞並非有關那位最近復出的長青玉女,而是曾任她經理人的那位先生的死訊,也就是我的中學同學。事出突然,我久不能平復,小秘看在眼內,只傳來「保重」兩字,昨天最終亦將這兩字轉贈女同事。
可以的話,我倒還想將一位同學的悼文留言再送:在這個悲痛莫名的時間點,憶故人之餘,亦在在需要往前看的好提案。我們(同學間)應定好四個約會。一個近啲;一個遠少少;一個再遠啲;仲有一個都唔知有幾遠。第一個約會最好就係喺三個月之內,目的不過就係吃喝玩樂,及時而行,見面嘅前提就係彼此都要身體健康;遠啲嗰個可以係明年今日;再遠少少可以係三年後;最後一個就係約定今生之後就喺上面見,惟先到先等。
所言甚是,而當我們總以為第四個約會很是遙遠,但其實可以是明天,差一點是今天,再差一點是昨天。

盧先亞

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載