› 選擇地區
三藩市
紐約
洛杉磯
其他美國地區
香港 台灣 北美
 
2013年03月05日

中環在線:何超瓊百無禁忌
搞殯儀一條龍 - 李華華

賭王千金何超瓊揸弗嘅信德(242)主要經營旅遊、地產業務,前年沾手陰宅生意,推售澳門骨灰龕項目永念庭,最近仲喺香港推出一條龍殯儀服務作為配套,講明禮儀業發展潛力大。
何超瓊進軍殯儀業不足為奇,事關賭王有份投資本港大型紀念館沙田寶福山,但幫襯何超瓊不等於一定買到寶福山龕位。

代搵陰宅 中港澳都有

永念禮儀主要按不同宗教(或無宗教信仰)提供殯儀服務。永念服務公司總經理鮑慧玲話,公司可以額外替客人喺中、港、澳等地物色墓地或龕位,但「全行都冇人保證搵到位……合法嘅嘢唔多」。
佢認為,內地與台灣相對重視喪禮,從業員唔介意向人表明自己從事呢行,香港喺殯儀業嘅發展就相對落後。
「殯儀唔係冷冰冰嘅死人生意,反而係以人為本。」鮑慧玲話,遇上親人離世,家人通常有好多問題,正需要受過培訓嘅客戶服務員按先人喜好策劃喪禮,永念就係希望提供明碼實價嘅服務。根據永念網頁資料,服務收費介乎1.2萬至3.9萬元。買墓地或龕位費用當然另計。

非大茶飯 「但潛力大」

信德前年開始推售澳門氹仔嘅永念庭龕位。鮑氏透露,首階段推出超過1萬個龕位,截至去年底售出3,900個,以均價8萬元粗略計算,套現超過3億元,絕大部份買家係澳門人。
佢強調,信德一早計劃拓展殯儀業作為配套,雖然投資唔大,表面並非大茶飯,但發展潛力大。

李華華
mailto:LiWaWa@AppleDaily.com

新game出爐 ~ 快啲試下自己有無辦法上車啦!
【「樓」年運程小測試】
http://www.tomonews.net/game/hkhousingpolicy/

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載