› 選擇地區
三藩市
紐約
洛杉磯
其他美國地區
香港 台灣 北美
 
2013年03月05日

金手指:信錯夏佳理? - 孫柏文

作為股民,買貨當然好多考慮。而我哋一眾評論員、分析員同大家講嘅,好多時都係講間公司盤生意會點。好多時唔講嘅,就係間公司啲人奸唔奸。公司啲人衰的話,就算盤生意好極,作為股民都係死。咁重要又點解唔講呢?因為第一,我哋講得、寫得某間公司,都已經為大家盡量過濾過,衰嗰啲唔寫。第二,講完唔知有乜下場。
做財演、股民要研究公司啲人得唔得,就要博博吓。如啲英文名有英文字母X行頭嗰啲,連盤數堅定流都唔知。最好啲人喺香港好耐歷史,就算唔係喺呢度出世,都要喺呢度威。最信得過當然係代表小股東利益嘅獨立董事,做過政府、民間、商界嘅最高領導。有咁嘅背景,先會尊重香港法治,知道攞豁免一定俾人炳到趴街。
佢係邊個?咪就係前立法會議員、前行政會議成員、香港賽馬會前主席、港交所(388)前主席夏佳理。邊間公司?咪係南華早報(583)嘅獨董。
佢董事局幾年前已經知今年2月大股東股權,將會超越港交所要求最少街貨量嘅標準。港交所一做警告話唔搞掂超標問題,就會停牌。一旦股權買到超標,就要general offer,出價問其他股東買剩餘嘅股份。

南早停牌點收科

你話賭accumulator輸到出唔到offer,咪減持或配新股囉,一百幾十個方法處理,作為獨董嘅港交所前主席冇理由唔識。究竟代表我哋啲獨董開會時做啲乜嘢?點解𠵱家會停咗牌?冇答案,啲小股東好慘。我好希望有前線記者,走去問吓夏佳理究竟搞啲乜。問吓佢點解董事局老早知都唔搞掂佢?如果大股東冇計劃擺平,點解唔辭職代表小股東抗議?
孫柏文想問夏佳理,你知唔知有幾多股民,睇住係你做獨立董事,所以入股?因為信你,搞到停牌冇眼睇?你知唔知,網民已廣傳「信夏佳理一成,雙目必定失明」。

孫柏文
獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載