› 選擇地區
三藩市
紐約
洛杉磯
其他美國地區
香港 台灣 北美
 
2013年03月06日

智取大市:億和中線睇升五成 - 晉佳

近排個市明顯有壞消息就向下隊,2月21日驚中美收水,恒指單日跌400點;2月26日就驚意大利大選令歐債危機復發,嗰日又唔見300點;前日就因為阿爺重手調控內房,個市又跌多342點。至於風平浪靜嘅日子,恒指多數企穩,有好消息就大幅反彈。綜合上述情況,壞消息跌、好消息升、冇消息就唔升唔跌,晉佳覺得港股短線差極都係中性評級,當壞消息消化得七七八八,照計好友信心會回復,淡友亦可能收籌,大市反彈動力就開始增加。
論牌面,中美收水驚過,之後澄清冇咁快,樓市調控又驚過,變數較大嘅剩番歐債,但形勢已比兩三周前好得多,短線可博反彈。
睇圖嘅話,恒指去到23100左右先會出現平台阻力,𠵱家保歷加通道中軸約23000,上番三大壞消息之前嘅23300難度唔大。投資者可以等大市反彈到23000至23300,觀察形勢再決定去留。

今年收成期料可翻身

短有短炒,策略上最好係搵上月三大壞消息之前,股價原本上緊,但被跌市窒住道氣,噚日見風浪已過想再起動嘅股份,億和控股(838)就係典型例子,2月8日由1元左右,升到2月19日最高1.26元,之後大市開始跌,噚日反彈到1.23元,等於冇跌過,股價硬淨之餘仲係開始起跑,似乎後市有計。
論基本因素,億和近年發展汽車模具同零部件業務,高層話今年進入收成期,仲泊到東風呢個大碼頭,後者旗下四大合資品牌(豐田、日產、標緻及雪鐵龍)嘅定單,億和都有份,仲有同福特、通用汽車合作嘅項目。億和做開打印機,有唔少日本客,包括巨企東芝、佳能(Canon),日本客要求多多億和都服侍得掂,證明執行能力唔差。
點解股價咁低殘,主要因為2011年日本大地震,震散咗億和嘅打印機、影印機零件供應鏈,盈利一直冇起色。今年汽車模具同零部件業務進入收成期,億和理應有機會翻身,中線睇1.80元,上升空間46%,跌穿噚日起步位1.14元止蝕。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載