› 選擇地區
三藩市
紐約
洛杉磯
其他美國地區
香港 台灣 北美
 
2013年03月13日

中環在線:電訊商𥄫中夜期商機
雲端𢱑生意 - 李華華

設計對白

港交所(388)下月8號推出夜期,證券行老闆除咗要搵人輪更睇檔,仲頭痕緊點樣叫經紀將客戶嘅「柯打」錄音,事關唔係個個經紀都願意夜晚留守證券行,手機接客戶柯打始終有限制,有見及此,有電訊商就向證券行老闆埋手,推銷手機錄音計劃,但證券行暫時嘅反應嘛嘛。

錄低客戶落盤電話

聽聞,香港電訊(6823)同數碼通(315)睇到夜期可能帶來嘅商機,最近向證券行推銷手機錄音計劃,證券行要畀一筆服務費,經紀亦要額外畀幾百蚊月費,轉用電訊商特別提供嘅網絡服務,所有通話都會被錄音,證券行之後可以用雲端技術聽番啲錄音。
聽落呢個服務幾好,經紀喺5點至11點夜期時段,唔使留喺證券行,喺屋企或者企喺條街度,都可以用手機接客戶嘅落盤。問題就係錢作怪,證券行暫時估唔到夜期旺唔旺,如果生意有限,證券行仲要嘔錢買套服務,真係未見官先打八十。

經紀嘔多筆未必制

而且,呢個錄音系統好似係冇得揀,所有對話錄晒音,即係經紀同情人講嘅悄悄話都會錄低,為保障私隱,經紀要出多部手機,專門用來接客戶柯打先至得;忽然多兩筆開支,既要買手機,又要用多個網絡計劃,經紀未必肯制。
講到尾,經紀嘅生存空間越來越窄,對於證券行嚟講,客戶直接用Apps或者網上落盤最慳成本,唔少證券行為夜期做好呢方面嘅準備工夫,經紀睇怕要自求多福了。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載