› 選擇地區
三藩市
紐約
洛杉磯
其他美國地區
香港 台灣 北美
 
2013年03月13日

智取大市:人棄我取 寶信吼位撈 - 晉佳

港股近兩日跌勢頗為慘情,雖然指數唔算大跌,但二三線股隊鑊甘,唔少風電、頁岩氣、節能概念股兩日跌超過一成,呢刻除咗藍籌之外,散戶揸乜都驚青,應該已經震走唔少人。
指數跌得少、非指數股跌得多,晉佳直覺呢種震倉潮唔會持續好耐,等各個板塊跌到夠超賣,未來幾周就可能有反彈,至於幾時跌定,去到噚日仲未夠皮,睇多兩日吧。
對於冇貨一身輕嘅投資者,𠵱家當然係吼位博反彈嘅時機,至於高位至今都冇走嘅,到𠵱家先嚟沽貨棄戰又可能遲咗啲。面對呢種進退維谷嘅情況,心態上已經唔好再諗最近一頭半個月點樣打回原形,比較好嘅策略係未來幾個月跌到大家驚青時就加貨,反彈番去高位安全期就減貨,慢慢令個倉喺chok市之中「坐和望贏」,𠵱家就係比較接近加貨嘅時間。

分段吸納目標九元

板塊方面,可以留意汽車代理股。舊年內地宏觀經濟環境麻麻,內地車市曾經相當滯銷,驚一眾債台高築嘅汽車代理股過唔到呢關,俾人掟得就掟,今年車市環境好咗,汽車代理股開始度過危險期,而售後服務業務不停膨脹,製造現金流,相信可以紓緩財困,嚟緊業績有可能反映呢種情況,估值已經值得回復正常水平。
正通汽車(1728)同寶信汽車(1293)以高檔車作招徠,中升控股(881)就賣日系車,中日糾紛始終影響後者生意,所以揀股都係前兩者較好。正通前兩年俾母公司注入經營路虎、捷豹嘅中汽南方,由於中汽南方銷售表現一般,俾人覺得公司高價上市之後,再用股東錢去買番嚿差啲嘅資產,個底比較花,而市場亦較喜歡品牌側重寶馬嘅寶信。
寶信近幾個月強勢過正通,事實上喺12月配股之後,成交開始轉活,仲要炒高完已經散埋貨,不過,估計喺配股前後嘅6元邊位會相當穩陣,相信跌到6元機會唔大,昨收7.26元,等跌穿7元可以開始分段撈,中線上望9元,明顯跌穿6元就止蝕。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載