› 選擇地區
三藩市
紐約
洛杉磯
其他美國地區
香港 台灣 北美
 
2013年04月09日

八達通憂手機錢包爭食
張耀堂:多個人做 肯定拉薄

面對信用卡發展手機錢包,八達通行政總裁張耀堂指,快捷是八達通勝過信用卡之處。 麥永健攝

【專訪】
無論是在地鐵站,抑或是巴士、小輪,甚至部份商舖,八達通的「嘟」聲已經成為港人生活一部份。身為現金以外,小額支付巿場的「一哥」,近來面對信用卡發展手機錢包,欲搶佔小額支付巿場。八達通行政總裁張耀堂直指:「多一個人做生意,肯定會拉薄咗。」
記者:關穎欣

相關新聞:賓架出身 掉頭籲嚴管銀行

不過,張耀堂指出,八達通跟信用卡於本質上不同,巿場定位上亦有不能作直接競爭的部份。「信用卡一嚟唔係個個用得,亦都有人唔鍾意先使未來錢,唔想使大咗。」八達通亦較易取得,即買即用,「唔駛記名,50蚊就有張。」八達通另一較信用卡優勝之處,就是快捷,「特別係用喺交通上面,一秒都唔慢得,地鐵前面嗰個人『嘟』慢啲,後面已經逼上嚟。」
前年八達通亦進佔街巿,與領匯(823)合作,在大埔大元街巿首創八達通收費。「成班同事即刻去嗰度shopping,『嘟』八達通食豆腐花。」他透露,下一個設八達通收費的,將是何文田愛民邨。
至於網上支付這個新巿場,張耀堂亦相信八達通有優勢,可分一杯羹,「有時唔想俾人知上網買咗乜嘢,但信用卡寄月結單時會有紀錄。」另外,八達通亦堅持有一卡在手,才可交易的原則,「有人驚啲資料輸入晒上網,會有紀錄,俾人盜用」,故八達通目前在自己網站試行的網上支付,亦要求客戶連接一個讀卡機,以「嘟」卡形式完成交易。

商戶簽約 即拉隊去「嘟」

八達通三年前爆出出售客戶個人資料事件,當時行政總裁陳碧鏵下台,換上曾於星展、花旗及VISA等機構出任地區「阿頭」的張耀堂。由銀行家轉任小額支付卡公司行政總裁,兩年多過去,張耀堂指加入八達通非常開心,「做嘅唔係驚天動地嘅嘢,但生活就咁樣唔同咗。」
「做國際性大公司,諗唔到有乜嘢可以喺出面同人講:『呢樣係我做嘅』,因為好多都係成個區域一齊做。」加入八達通後,他指成功感比起從前在大公司任職大得多,「見得到嘅成功感,同之前嘅好唔同」。每爭取到一間八達通新商戶,他已滿足得跟團隊開香檳慶祝,「有啲客要『 𦧲』好耐。」他說得眉飛色舞:「有啲舖頭啱啱簽咗約,我哋就會拉隊去『嘟』八達通消費。」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載