› 選擇地區
三藩市
紐約
洛杉磯
其他美國地區
香港 台灣 北美
 
2013年04月11日

中門大開:馬丁儍的嗎? - 添馬男

李柱銘現時拋出所謂底線方案,百害而無一利。

李柱銘接受《明報》專訪,拋出他心目中底線方案,認為可接受選委會變成提名委會員,由佢哋選出五個候選人參加直選。馬丁的算盤好易明,因為2012年選委中泛民陣線佔230人左右,足以提名一個候選人入閘,按此推論,2017年提名預選中,泛民候選人應可取得200票左右,排第四至五名入閘。

大戰當前 不應示弱

政治當然唔係算術,馬丁這時拋出所謂底線方案,百害而無一利。𠵱家雙方正在玩沙蟹,開天索價之際,為何忽然走出來落地還錢?戴耀廷為佔中造勢,為乜?梗係扮「級手煙」,喬老爺怒氣沖沖,當然亦係扮,至少一條花,大家鬥拋,睇邊個淆底冚牌唔去。點不知泛民呢邊有位塘邊鶴「唔生銹」,大大聲指住戴耀廷底牌話係3仔,你話死未!
馬丁可能不甘寂寞,所以見到有記者專訪就有碗話碗,有碟話碟,佢實在天真,來訪者將馬丁意見放大,客觀效果就借馬丁言論搞亂佔領中環,製造泛民內部混亂。馬丁之儍,可能仲將心比心,以為該報乃公信力大報,所以先無防範。退一步講,馬丁就算心中有此底線方案,理應先同泛民頭頭溝通先,總好過突然拋出來,公民黨、民主黨也殺個措手不及。
政治談判是講部署、策略,一切均是姿態,馬丁現階段釋出肯談判之善意,北京會點睇?第一時間回招就係玩分化,挑動內部矛盾。泛民姿態上要淡化馬丁方案的衝擊,視之為民主黨一位普通黨員的意見,僅此而矣,千萬唔好中傳媒所設下之陷阱,煞有介事地討論馬丁建議,無論贊成或駁斥,泛民中人都已中了招。
今次政改角力,已到了關鍵十字路口,而對手共產黨比泛民在專業水平上高出幾倍,而泛民不過是一條鬆散之聯合陣線,紀律欠奉,背後若無大規模群眾動員作後盾,根本就冇對等談判地位,更難望爭取到一個較民主的方案。現時泛民唯一要做就係為佔中造勢,催谷群眾,說服未buy in的中產人士。佔中在輿論上算是站穩陣腳,但只走出了一小步,今年六四、七一政治集會上,要大力宣傳佔中理念,前邊仲有一大段路要走。
當然,泛民只係鬆散之聯盟陣線,好難禁止其他人言論,但至少大家可以訂出現階段工作重點,聚焦在有用、有建設性工作,將口水方案擺埋一邊唔好理。

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載