蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年04月17日
馬上成為壹會員

中環在線:
波士頓爆恐襲 水哥狂收問候Call - 李華華

今年波士頓馬拉松發生爆炸事件,圖為賽事開跑一刻。 美聯社

波士頓馬拉松終點附近發生連環爆炸,造成百多人傷亡,再次觸發全球對恐怖襲擊嘅警號,雖然天有不測之風雲,但人間有濃情暖意。

親友關心 深受感動

銀行界長跑達人──恒生銀行(011)大公關張樹槐(水哥),跑遍五大洲全馬賽道,佢噚日大清早七點鐘,就開始收到政商、體育界各方好友嘅電話、電郵、短訊慰問,總共有成三十幾個咁多,包括遠在加國朋友嘅關懷,人人擔心佢去咗波士頓跑,事實上,佢今年冇參加。

誓圓六大馬拉松夢

難怪呢位鐵人話,對悲劇發生感到難過,但各方好友噓寒問暖,令佢親嘗友情可貴,深受感動。
波士頓馬拉松係全球六大馬拉松之一,唔係有錢就有得跑,要跑過認可馬拉松,按年齡達到賽會標準時間先有資格報名。
水哥憶述,2010年曾參加過呢項殿堂級賽事,氣氛熱鬧,當時沿途有超過50萬人圍觀打氣,佢作為馬拉松跑手,諗起令人興奮嘅賽事驟變悲劇,感受尤其深刻。
咁今後會否絕緣美國賽道?水哥都好矛盾,世界六大馬拉松,佢仲差芝加哥同東京兩個地方未跑,佢嘅心願就係跑晒六大馬拉松。照咁講,佢應該仲會飛去美國跑埋芝加哥賽事啦。
世界六大馬拉松之一的倫敦馬拉松本周日舉行,佢祝願賽事能順利舉行,參賽者平平安安,整整齊齊。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載