› 選擇地區
三藩市
紐約
洛杉磯
其他美國地區
香港 台灣 北美
 
2013年04月26日

智取大市:
中資股炒上落 贏錢唔難 - 晉佳

噚日資金集中炒作中資藍籌股追落後,至於非中資股就轉弱,尤其一批前排強勢嘅股份都逆市回吐。對於一向追隨增長、復蘇概念股份嘅晉佳嚟講,噚日係艱難時刻,但諗番轉頭,喺冇槓桿或輕微槓桿情況下買入一批中資藍籌股,長中短線回報都冇乜吸引力可言,所以唔考慮換馬。
事實上,嗰批中資藍籌股當中,有唔少基本因素已經失去改善動力,盈利長期打橫行甚至向下沉,包括中國移動(941)、石油股、煤炭股等。市況好時,大家根本唔想理呢批半生不死嘅股份,因為升又升唔多,好難有賺大錢機會。
不過,每一年半載佢哋又梗有低位畀你買,提供穩賺一成嘅機會,對於心頭唔高嘅穩健型投資者,的確係一條出路。

首選神華博賺一成

經典例子就有中移動同中國神華(1088),先講基本因素,中移動客戶數字仍有增長,不過嚴格嚟講,業務已經完全成熟,收入、盈利增長極慢,但係業務收縮、面對競爭程度同樣有限,即使近排驚微信搶生意,短訊、彩訊收入少咗,但呢part只佔整體收入7.8%,對整體盈利打擊有限,𠵱家10.5倍市盈率,股息率4厘,PE去到12倍可能又嫌貴,10倍樓下又過平,所以波幅咁窄。
至於神華,目前面對煤炭運輸瓶頸尚未解決、行業供過於求嘅困擾,煤炭價格有下跌趨勢,目前市盈率8.8倍已經足夠反映艱難情況,市盈率8倍樓下開始覺得抵,但10倍樓上又似乎偏貴。
喺客觀環境唔會改變之下,中移動同神華睇嚟只會維持之前嘅波幅範圍游走,其中,神華博反彈較有肉食,噚日收市價26.85元屬於中線低位,上番30元就賺一成,喺港股中短線雨過天晴之下,唔大貪者可以一買。
要注意嘅係,神華盈利未來有慢慢下降嘅趨勢,中線股價難以去到年初高位35元,所以揸中線,穩穩陣陣睇33元就算。呢啲就係easy money,只睇閣下滿唔滿足。

晉佳
本欄逢周一、三及五刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載