› 選擇地區
三藩市
紐約
洛杉磯
其他美國地區
香港 台灣 北美
 
2013年07月08日

中門大開:自製堆填區炸彈 - 添馬男

堆填區擴建計劃亂開空頭支票下,政黨醞釀阻撓,擴建隨時觸礁。圖為屯門堆填區。

堆填區擴建正迅速惡化,長毛宣稱會拉布阻撓,民建聯兩邊不是人,擴建隨時觸礁。梁粉諉過於政黨政客,林煥光頻頻將管治失敗歸咎立法會政黨。
堆填區及焚化爐事件,完全係梁粉政治操作失敗,與人無尤。「高開低收」——over promise, under deliver,乃梁粉施政一大特色,一開波就唔理三七廿一,討好咗傳媒群眾先,但跟手發現做唔到,便用語言偽術去兜,最後為求一時之快,三秒sound bite,而變成小人及庸官。

亂開空頭支票 自取其辱

𠵱家堆填區及焚化爐之所以搞到一鑊粥,乃政客over promise, under deliver之典型案例。明知擴建堆填區及興建焚化爐,上屆政府一直細心部署,為爭取鄉事力量,尤其是屯門鄉紳支持,所以先擺劉皇發入行會,借發叔之力去說服鄉事勢力撐不受歡迎基建。第二步就係低調少說話,低調進行利益交換,以under promise, over deliver方式進行。當時萬事俱備,但遇上剛勝出選舉之新貴特首梁振英高調扮環保,認為先做源頭減廢,於是在梁粉環保人士及民建聯之助下,將本已成功上馬之工程推倒,當時小弟已預言日後梁振英必定瀨嘢。
因為遠水救唔到近火,政策上源頭減廢只係環保界白癡口號,根本不能當真,但競選時梁要爭民望,便有咁盡去咁盡,以凸顯唐英年支持焚化爐的落伍。
梁振英呢種羅湖城超A版「求變」訴求,配合梁粉報宣傳,的而且確成功令佢當選。出嚟行始終要還,𠵱家外邊指摘局長黃錦星冇料,拉唔到票,其實他不過係代罪羔羊。
陳茂波又係另一個典型,每當政策面對批評,二話不說便走民粹,立即討好傳媒市民,好似上次話研究解放軍用地起屋,一講完就要收番,最近又話研究收回粉嶺高爾夫球場用地起屋,結果第二日就顧左右而言他,支吾其詞。一年來市民唔信梁粉,就係因佢哋扮有型,開口中,但又交唔到貨。
過去政務官智慧「under promise, over deliver」,因為明知道香港政治建制乃築在浮沙之上,沒有堅固基礎,政治上才用穩守突擊策略。梁粉業餘政客,水平低,區議員level,要有型扮進步,變成高開低收,係自取其辱!

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載