› 選擇地區
三藩市
紐約
洛杉磯
其他美國地區
香港 台灣 北美
 
2013年07月17日

中門大開:高開低收施政 - 添馬男

曾俊華較少公開發表言論,民望反而企穩三甲。

《信報》金針集揭露發展局近日提交給立法會的文件指出,將工業大廈改建成「過渡性房屋」的方案,並不切實可行。該專欄作者紀曉風指出,這個最新說法,正正違反了問責班子過去一直提倡的建議。過去一年,由梁振英到林鄭,不斷大力推銷將工廈改成住宅,點解一年後,先至發現工廈住人有通風、交通、噪音問題,令改裝不可行。一個曾幾何時高調推銷,凸顯新政府有新思維嘅政策,原來根本冇諗清楚,亂噏廿四,一年後靜雞雞摺埋。特區政府管治水平墮落,完全咎由自取。今次冇得賴議會政黨。

業餘政客噏咗先算

689之搞到如斯田地,係因為業餘政客短期行為,討好民粹噏咗出街先算,由上而下施政係冇問題,但連基本政策論證都冇便宣佈,就幾得人驚。政務司林鄭月娥應該是操作執行層面把關人,佢係政策委員會主席,監督各政策局政策草擬工作,並且上屆出任發展局長時,主理工廈活化計劃,即使689亂噏,林鄭應該早知是否可行,而唔係一年後,先知單幢工廈不宜住人。
政務官訓練對新構思側重可操作性討論,因為意念人人有,斗零都唔值,執行細節先係關鍵,公共政策涉及社會大眾利益,只要執行上冇諗通諗透,小小執行漏洞,足以推翻整個構思。香港公務員體制中,一個staff grade C,丙級政務官已具備呢種論證能力,問題係政客司局長水平太低。
政府施政朝令夕改,半桶水、高開低收,係會不斷削弱巿民對政府信任,業餘政客為求今日有靚sound bite出街見報,唔會理長遠後果,但香港人亦唔儍,對業餘政客有戒心,所以梁粉政府中曝光率最高,日日有嘢講嘅兩位仁兄,即689及陳茂波民望最低,反而越少公開發表言論嘅財政司司長鬍鬚曾,民望企穩三甲。
外國政客之所以亂噏唔死得,乃因為有政治建制支撐,包括黨派媒體、智庫、黨友、意見領袖,香港政治建制散修修,業餘政客打單泡,噏完冇echo,冇護航,風險十分高,香港政客更應該慎言,689及梁粉們卻執意反其道而行,講多錯多,成個政府民望又點會唔仆?

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載