› 選擇地區
三藩市
紐約
洛杉磯
其他美國地區
香港 台灣 北美
 
2013年07月17日

智取大市:中生製藥長線之選 - 晉佳

謝炳(左)任主席的中生製藥不受錢荒影響,可望變身增長股。 資料圖片

前日有報章話二三線股禾雀亂飛,係!係有唔少股份例如新能源股炒上,但科網股亦有一隻網龍(777)破頂後單日跌足兩成,順手整瓜埋個別手機股,中國無線(2369)、TCL通訊(2618)噚日跌4%至5%,至於整體個股升跌比例約5:6,跌略多過升,唔算十分好炒。
究竟炒股唔炒市好,定係靠邊站等方向好,晉佳偏好後者。
不厭其煩講多一次,H股指數月線圖MACD發出雙熊訊號,係指數推出廿年都未見過,好難叫晉佳相信後市冇風險,尤其市場近排開始唔再驚、慢慢買番貨嘅時候,下一浸危機可能醞釀緊。

珠船到價 先沽一半

又要戴頭盔,又怕錯失長線機會點好?最好就限注買入最好嘅板塊──醫藥股。理由係行業會隨着內地經濟同居民收入上升而穩步上揚,唔受錢荒等流動性因素影響,可以投身增長股行列。
醫藥股當中,中國生物製藥(1177)同利君國際(2005)破頂咁嘅勢,至於晉佳愛股復旦張江(8231)亦一樣唔失禮,距離高位只差一成。

復旦張江增長強勁,但歷史市盈率50倍,夢幻價無謂同佢計數,至於中生製藥同利君比,晉佳比較喜歡前者。
中生製藥主要從事心腦血管及肝病藥,屬於較高檔藥品,市場競爭冇咁大,過去幾年保持增長,亦證明佢喺行業有一定競爭力,但過去較為人詬病,係非控制權益利潤比例較大,蠶蝕咗利潤增長表現。
不過,睇番中生製藥第一季數據,發現非控制權益利潤只佔整體利潤四分之一,影響利潤增幅程度減低,至於收入同純利增長大約三成左右,經營槓桿大概一倍,而歷史市盈率30倍,估值合理,加上手頭淨現金有成28億元,財政健全,唔怕加息、錢荒等等問題。
好似晉佳咁睇淡後市、而唔想全揸現金嘅情況下,中生製藥絕對係可以選擇持有嘅股份。
由於珠江船務(560)已經升上3蚊到晒價,現時不妨減持一半,換入中生製藥,破頂lead住5%先考慮加碼。

晉佳
本欄逢周三刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載