› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

中門大開:蛋散商界救港 - 添馬男

曾俊華遭陳啟宗等梁粉指控「應使不使」後,近日不點名反駁。

財爺在潮州商會午宴上開拖,不點名反駁陳啟宗等梁粉指控佢唔肯使錢之言論,財爺論據其實好簡單,你成棚業餘政客一人一句、個個胸懷大志,誓要改革香港深層次矛盾,大計多籮籮,但游談無根,口號一直仍停留在口號層面,從未認真變成可操作之公共政策,你叫財政司點樣撥資源呢?財爺係劍術高手,視中國女劍客第一個奧運金牌欒菊杰為偶像,一劍就刺中梁粉死穴。

無執政綱領 但要話事權

回歸以來,香港一直存在兩條路線之爭,張志剛稱為建制改革派同既得利益派、梁振英當然是改革派,政務官系統當然係既得利益派。問題係改革派根本無一個核心執政綱領,東一拳、西一腳,並無套路章法可言,董建華曾經以七年時間去實踐所謂改革,結果一事無成。呢條路線早在基本法起草年代已形成,鍾逸傑、羅康瑞、梁振英一班人意圖效法日本經團連,以工商界力量奪取官僚在產業政策上話事權,30年來從未成功,何解?
香港商界根本唔夠班,在英人眼中係一班只會尋求個人利益之蛋散,前中策組首席顧問顧汝德認為北京最錯係誤信香港工商界,以為佢哋係管治精英,實情香港經歷多年經濟動盪,大小危機,呢班蛋散全無貢獻可言。其實官僚在呢方面經驗比蛋散商界豐富,至少跟過英國佬做嘢。一棚烏合之眾要將特區政府改成通產省MITI,真係笑大人個口。八十年代發展經濟學呢套,根本已經爆煲,一場亞洲金融風暴,已揭示亞洲各國商界之貪污腐化,官商勾結後遺症。
當日特首選舉,香港人受到傳媒蠱惑,認為梁之政綱是改革香港良方,其實不過係老董舊酒換上新瓶,而更差的是執行者水平比老董年代更低,更無民意基礎。港版淡馬錫、經發局未上場已被打柴,根本無市場,結果自然諉過官僚。財爺早在董朝出任工商科技局局長時,已經處理過大大小小產業優惠訴求,包括老董引來之圓晶生產商漢鼎亞太,又要地、又要稅務優惠、仲要由內地輸入外勞,結果又係俾曾俊華一手打沉。
本地政客多年來無視商界落後之現實,不斷提出干預市場政策,以大有為施政改革所謂深層次矛盾,將社會折騰而一事無成。
香港人,好心大家醒一醒,睇清楚香港的客觀現實,幾條蛋散走埋一齊就話要改革香港,真係可笑!
還望財爺下次公開演講、將當日打殘老董高科技製造業春秋大夢故事,公諸同好,等大家知道歷史如何循環不息!

添馬男

杜汶澤、彭浩翔初會蔡瀾、黎智英!仲未睇?
第三集《亂噏24》足本放送中,即上:
http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載