› 選擇地區
三藩市
紐約
洛杉磯
其他美國地區
香港 台灣 北美
 
2013年07月31日

智取大市:港股現時是02年翻版 - 晉佳

港股現時情況越來越似02年環境。 資料圖片

睇番近期唔同嘅港股數據,都只能夠無奈。其中,最近20個交易日,恒指足足反彈1,295點,但呢段時間竟然有13個交易日跌股比例多過升股。換句話說,如果喺恒指反彈嘅呢段時間,隨機買入10隻股份,手上跌嘅股多過升嘅股,一啲都唔出奇,要贏錢實在太難。
剩係睇恒指,近期就由大戶喺22000關口chok上chok落,炒即日鮮有機會好淡通殺。買個股,揀中強勢股固然唔容易,但原來睇淡嘅話,開淡倉一樣被挾親,操作難度相當高。

撈底要睇實建滔化工

十個牛皮九個淡,中短線睇嚟難抱太大期望。雖然恒指市賬率1.4倍,H指市賬率得1.2倍,已經係熊市接近低位水平,但如果恒指市賬率跌到1.2倍先見底,都要跌14%,去番萬九點樓下,如果美股冧檔,恒指市賬率去到1倍,就要跌差唔多三成,𠵱家持股問你點捱?
投資者基本上已接近棄戰,因為內地整個工業已經一潭死水,仲未睇到有曙光,相信即使冇新危機出現,過多兩三個月,唔止買賣兩閒,情況仲越嚟越似2002年買賣蕭條嘅環境。
另外,睇番醫藥股、科網股呢類基本因素較好嘅股份,炒高到七七八八,市場上只會越嚟越冇嘢炒,到時就要專吼冷門股份先有出路,情況如同2002年買工業股一樣。
不過,晉佳對股市仲會有一絲希望,因為回想02年,等足一年之後,就喺03年出現一個長線買入良機,係一個足以令唔少人發達嘅機會,所以晉佳仲希望03年翻版會重臨,即使呢個低位要幾個月、甚至一兩年先出現,呢種等待都絕對值得。
究竟點樣可以盡早睇到呢個轉機出現?第一就係睇恒指、H指長線圖表。第二就係留意一批最先反映內地經濟狀況嘅股份,其中一隻可以留意就係建滔化工(148)。

建滔化工主要做覆銅面版、化工業務,好多行業都會用到。有大行曾經講過,話呢隻股係內地經濟嘅陰晴計,亦會最快反映經濟復蘇。換言之,睇到佢個股價長線有見底迹象嘅話,後市或許有運行,到時留一注持有佢都係唔錯選擇。
建滔化工舊年收入上升2%,但毛利率收窄超過兩個百分點,令純利下跌19.2%,至20.97億元,市盈率8.5倍左右。不過,今年上半年,內地經濟增長放緩,建滔理應更加難捱,所以市盈率拉高到10倍都唔出奇,咁就未算得上好吸引,如果要低吸,應該要等多陣。
建滔化工年初到𠵱家,股價一浪低過一浪,不過跌勢開始有放緩迹象,暫時應該可以繼續觀察,如果建滔開始改變一浪低過一浪嘅走勢,唔單止要買佢,仲要留意整個中港股市。

晉佳
本欄逢周三刊出

【動主播召喚 敢你就來】
立即報名: http://anchor.nextmedia.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載