› 選擇地區
三藩市
紐約
洛杉磯
其他美國地區
香港 台灣 北美
 
2013年08月15日

中環在線:港股全日停市 難得多日假
8號波 如何過? - 李華華

超人撤資,李氏力場效力漸失,本港立即抵受唔住進擊之颱風,噚日天文台掛出今年首個8號風球,雖然下晝已改掛3號風球,但足以搞到港股停市一天,對上一次港股因颱風全日停市已經係2011年嘅事。難得多咗成日假,究竟股評人、分析員同經紀會做啲乜呢?結果唔少人都係選擇瞓晏啲!
要數最爛瞓嘅,應該係人稱「沈大師」嘅股評人沈振盈,佢自爆噚日瞓到中午12點先起身︰「7點幾起咗身,知道上晝冇市,就邊開住電視邊瞓覺,感覺好relax」。佢仲好興奮咁話,難得周中有得休息,就算下晝要返公司處理文件,但由於唔使睇實個市,所以工作效率仲高咗。
靚仔股評人鄧聲興都話,比平時瞓多三粒鐘︰「正常6點鐘起身,今日(噚日)就瞓到9點幾。」佢笑言,只得半日空閒時間,想睇戲都睇唔切。有電台節目在身嘅陳永陸同胡孟青就冇咁嘆,指工作量同平時冇分別,反而開咪唔使報價,多咗時間同聽眾分析公司業績咁話喎。

分析員刨業績冇偷懶

要同業績搏鬥嘅,仲有一眾分析員,雖然股市冇開,佢哋就算唔使返公司,都要喺屋企刨業績、寫報告,絕冇偷懶。有資格全日休息嘅,相信只有股票經紀,但華華所認識嘅經紀,唔知係咪職業病,定係夠專業,連買唔到嘅A股同日股都唔放過,照樣跟到足,到下晝收咗市,先至喺屋企煲劇、打機。
所以話打風有假放呢支歌仔,已經唔太合時喇。

李華華
mailto:LiWaWa@AppleDaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載