› 選擇地區
三藩市
紐約
洛杉磯
其他美國地區
香港 台灣 北美
 
2013年08月27日

金手指:一注獨贏天能 - 孫柏文

天能作為行業龍頭,受惠新環保政策,股價添動力;圖為天能主席張天任。 資料圖片

上禮拜五,我講過嘅珠江鋼管(1938)出業績,比想像中好;不過有條數我要繼續研究,下周再講。
今日叫大家一注獨贏天能動力(819)。拜讀上周四關sir(關焯照)專欄話呢隻係佢嘅愛股,現價值博,所以晚輩趁機講吓。
關sir話買嘅理由有兩個。一、佢係鉛酸電池業龍頭;二、市盈率低兼派息高。咁市盈率低就一定有理由,冇咁大隻蛤蜊。關sir篇文提到天能之前有「驚人跌浪」,喺低位反彈後,又因被爆旗下廠房漏鉛,所以再跌。
唔知係咪因字數有限,我想幫關sir補充第一次大跌係因發盈警。大鑊?係,不過睇番另一龍頭,即係電台拍檔、電池股癡火燎森叫過我買嘅超威動力(951),亦同時發盈警。原因係中央向鉛酸電池製造業大加環保條例,年底生效,即益大公司。不過聽行內人士話,結果係嗰啲年底要停產嘅細廠,就唔理機器成本,連維修都唔做咁割喉式賣貨,令全行受壓。啲細廠會咁做,證明政策係堅,龍頭股明年必更好,仲要跌咗落來大減價,仲唔買?所以市場覺悟時,天能同超威即呈現大反彈,相繼重返盈警前股價。

細對手瓜晒 有排升

點知央視喺8月初報道話天能漏鉛,令佢再跌。咁仲買?當然啦!央視呀大佬,擺唔平咩?仲有前車之鑑,2010年尾火燎森第一次同我講天能對手超威,話好,不過亦話被爆漏鉛要停產,股價急跌。之後超威再冇見過嗰個價位!好似80年代Union Carbide印度化工廠爆炸死幾萬人,嗰刻就係買該股最好時機。
揀天能嚟講係因為我覺得關sir錯,天能作收3.21元,佢話3.8元做目標價,有冇搞錯!漏鉛擺平都4蚊啦!如果出年真係細對手瓜晒,仲唔超今年高位6.17元?仲唔一注獨贏天能動力?

孫柏文
獨立股評人
http://facebook.com/shuen
本欄逢周二刊出

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載