› 選擇地區
三藩市
紐約
洛杉磯
其他美國地區
香港 台灣 北美
 
2013年08月28日

智取大市:對手落難 海螺最開心

中建材遇困,海螺最着數。圖為海螺主席郭文叁。 資料圖片

當建行(939)年度化市盈率(PE)變得5倍唔夠,神華(1088)又得8倍,晉佳都不禁問自己,H股指數仲有幾多空間可以去跌?
呢個時候,再睇吓隻中建材(3323)盤數,嘩!淨資產負債比率成5倍,拎住1蚊資本就孭住5蚊債,債主收數時,都唔知找得邊條數。
最大問題係,背後似乎有勢力焗住內銀繼續科水畀佢,負債比率先至可以去到5倍,唔止血就遲早由得佢膨脹到7倍,到時收唔到數嗰批債主,咪又係大家以為好平嗰批內銀股。中建材問題睇嚟會持續到現金流完全唔夠畀息為止,相信都唔使好耐。

市佔率長遠或大升

事實上,你想喺外國搵間上市公司盤數同中建材差唔多都幾難,原因係外國上市公司淨資產負債比率去到2倍,相信已經冇乜人肯借錢畀你。點解喺中國又得?呢啲咪係國情囉。國情呢兩字真係無敵,就如你用5倍PE去量度隻建行,都嫌貴一樣,呢啲情況根本不能用正常估值方法去判斷。
如果中國容許多十間八間中建材存在,未來中國至少又多成萬億人民幣債務有機會撇賬,實際上,成個中國至少有十間八間呢啲企業又真係唔奇喎。
由於資不抵債嘅企業甚至地方政府喺內地真係周圍都係,內銀股幾時先去認認真真計數,真係得個估字,市賬率1.24倍嘅建行,牌面平就夠平,但喺中央同內銀有決心清除潛在爛賬之前,長線盈利可測性仍然相當低,註定繼續要做價值陷阱。
中建材負債重到不得了,如果仲繼續擴充業務,都肯定係玩火。如果預期中建材遲早爆煲,或者要阿爺開一個機構去接管佢同佢阿媽,未來睇嚟冇乜藉口可以去擴充業務,估計佢最大競爭對手安徽海螺(914)最着數,到時連對手都fight低,海螺市佔率長遠有機會大幅提升。
事實上,海螺亦係水泥業行家聽到個名都腳震嘅公司,原因係佢殺落邊區開廠,競爭對手一定冇運行。有危就有機呢句說話真係冇錯,長線買入海螺嘅機會,睇嚟會係中建材落難嘅時候,𠵱家可以再等等。
另外一個選擇,可能係同時買海螺、沽中建材,當中都唔係冇風險,如果中國經濟失驚無神回復高增長,中建材經營及財務槓桿比海螺大,盈利反彈自然更快,股價反彈動力亦較強。
講開中國經濟回春嗰件事,甚麼匯豐PMI好勁,點知內地A股連續兩日偏弱,睇嚟市場暫時都睇死內地經濟唔得,再加上中石油(857)出一單咁甘嘅嘢,連續四個高層被調查,聽聞呢單嘢係清算周永康系人馬有關,如果係,分分鐘拖累埋其他石油股,事關石油股普遍有唔少周永康系插旗,屋漏兼逢連夜雨,睇嚟中港股中短線都要捱打。

晉佳
本欄逢周三刊登

一副24字的對聯影響蔡瀾一生,今集《亂噏24》,蔡瀾為你逐句解釋!
點擊以下連結,全集即時重溫!
http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載