› 選擇地區
三藩市
紐約
洛杉磯
其他美國地區
香港 台灣 北美
 
2013年09月11日

智取大市:
航運業回勇 金輝值博 - 晉佳

波羅的海指數開始走強,航運股值得睇好。 資料圖片

投資者最鍾意市場出現變化,最唔鍾意見到不明朗因素,喺不明朗因素逐個掃除之下,市場突然由8月底悲觀變咗𠵱家輕微亢奮狀態,個市升到停唔到,好彩晉佳及時轉軚睇番好啲。
上星期推介嘅中煤(1898),去到近兩日乖乖地爆升,觀乎大市仲未見派貨迹象嘅時候,相信啱啱轉強嘅資源股同乾散貨航運股,仲有得繼續升。
反映運載資源為主嘅波羅的海乾散貨指數,近期強到不得了,9月到𠵱家勁升三成,更重要係呢個指數突破咗營造超過年半嘅潛伏底,目前升到接近1500點,晉佳估計升到去2000點都唔係難事,乾散貨航運股值得繼續睇好。

破關成交增 大升先兆

晉佳呢兩日睇緊邊隻股個圖同波羅的海乾散貨指數最貼近,發現竟然係隻冷門股金輝集團(137)。金輝主要係經營、租賃船舶為主,回想呢隻股對上一次被投資者關注,已經係03、04年嘅事,當時航運業由谷底反彈,波羅的海乾散貨指數喺大半年時間內由2000點爆升到去5000點樓上,金輝股價竟然可以勁升超過30倍,當年基數低係最大原因,其中04年2月內,股價最多急升接近4倍。
論估值,金輝市賬率只得0.27倍左右,航運股之中可謂cheap上加cheap,淨係手頭上嘅船嘅賬面值都成91億元,粗略計算攤佔船舶應佔價值都有50億元,市值只得10億左右。
以今年上半年嘅艱難環境計,公司只能獲微利1,300萬元,不過,如果乾散貨航運業翻生,波羅的海指數升到2000甚至更高,仲可以持續一段時間,金輝嘅盈利可以正常化,粗略估計盈利去番2011年2.64億元,市盈率就變番4倍,股價亦有望返去當時高位3元,可用2.8元做中線目標價。

全球冷化 風電 光伏股散水

睇番金輝個圖,其實亦近似潛伏底,最近已經突破阻力線1.6元,噚日成交開始增加,只要活躍成交能夠持續,相信較大升勢會喺兩個月內出現。以佢過往有成交之下嘅股價爆發力相當強,2.8元目標價可能都算保守。
講開晉佳睇好嘅資源同航運股,其實最近有關全球冷化嘅消息,亦幫咗一把。之前咁多年講全球暖化,各國要使咁多錢去做減排,但𠵱家同你講減排唔使做得咁快都未死得,就可以將資源調配去刺激經濟增長,天氣凍用多啲嘅煤炭、高耗能嘅鋼鐵、受惠刺激經濟嘅航運股,都可以得益,但同時風電、光伏股就要避之則吉。
睇番近兩日股價趨勢,明顯以全球冷化受惠股較強,受累股較弱,就算認為全球冷化可能只係一個局,反正市場率先相信,你係炒股都要信住先,信不信由你。

晉佳
本欄逢周三刊登

激戰拍續集,但家輝話唔敢再變筋肉人?
到底練定唔練?即睇足本《亂噏24》,專訪張家輝、林超賢!
http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載