› 選擇地區
三藩市
紐約
洛杉磯
其他美國地區
香港 台灣 北美
 
2013年09月11日

中門大開:快手搭雞棚
- 添馬男

要幫阿爺做嘢分番個公關大餅,首先要搭個雞棚,成立一個組織,成員阿茂阿壽都得。

幫港出聲成立後大灑金錢,每兩個禮拜就燒一輪銀紙,在主要報章登全版廣告,每次至少燒幾十萬元,如果一路燒到明年7月,條數都幾襟計。最開心唔係報紙,而係負責做寫手、設計同落稿既公關公司,如果由周融承辦,就好和味。4As廣告創作人睇完就笑笑口話,份份都咁多字,標題又騎呢,唔知想點,但奇就奇在如此冇創意、不符張曉明提倡創新精神嘅廣告campaign,毫無效用,就可一直燒落去。

反佔中玩人海戰術

幫阿爺做嘢,比同商界及特區政府做公關marketing筍得多,因為冇衡工量值,總之發咗聲明、開咗記者會、登咗廣告稿就搞掂過骨,開單收錢。商界有客觀標準去衡量marketing campaign,反而阿爺就易收貨。由九十年代至今卅年,中央為維穩使咗幾多寃枉錢,到頭來有又點。今次反佔中鬥爭,又再一次出現「公關大餅」,各路建制人馬埋位開飯,人人有份,永不落空。
要分到呢個大餅,第一步就要做少林搭棚大師,搭個雞棚,成立一個組織,成員阿茂阿壽都得,最好就冇名冇姓冇track record,高調搞活動,使些少錢登廣告,要出少少豉油先可以引到肥雞來。香港八大院校不少一線教授已臨近退休,又想繼續撈落去,請佢哋做顧問,暗示自己檔嘢有內地撐,定必可以搵到一線教授落叠,有佢哋做生招牌,將來分公關大餅就容易得多。
第二步就要搵議題,跟住梁志祥應該唔會錯,你睇元朗有勢力鄉紳曾樹和,跟佢指揮,掂。洪水橋發展諮詢會連元朗警區都要搵佢傾偈,有地位兼畀足面,勁過劉皇發、侯志強。𠵱家黑白兩道都團結在反佔中維穩旗幟之下,不分你我,組織內吸納一兩件有背景人士,做起事來更方便。第三步就要搵敵人,民主黨公民黨最好砌,左右兩邊一齊夾,動搖佢哋參加佔中意志,孤立二線教授戴耀廷及陳健民。如果做到呢一步,大家就發達啦!
在反佔中鬥爭下,人人奮勇,個個爭先,內地就是不缺錢,用人海戰術,成立大大小小反佔中組織,日日霸報紙版面,直至主流中產煩到頂唔順為止。呢場仗成敗關鍵不在於理性、邏輯、論述水平及政治力,一於以量取勝,直至普羅大眾一齊發出「我討厭政治」呼喊為止。
批鬥林慧思運動及幫港出聲,正在活用此策略。

添馬男

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載