蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月18日
馬上成為壹會員

中門大開:董朝浮誇風再臨 - 添馬男

梁政府重回老董時代浮誇風,其實真正躁動是梁振英。

搶地搶到入郊野公園,等如向地產商表示梁振英建屋指標已成泡影,棄械投降。有常識者都知香港唔係缺地,只不過政府捨難行易,解放軍唔敢得罪,新界鄉紳係梁振英忠實政治盟友,為佢保駕護航做馬前卒,所以政府連僭建都雙重標準,邊有膽去掂丁屋地。兩大土地來源都由有勢力人士把持,好打得之林鄭司長,只係會揀冇還手能力嘅人打,鄉紳與軍隊,當然係扮friend揸手為上。

冇政策靠把口搭夠

民粹式建屋運動,源於梁振英選舉吹水空洞承諾,到遇上各式各樣城規、環保法例,就諉過公務員,一年下來,政府內部都知道解決房屋問題無捷徑,肯定成為一個推莊卸責遊戲,所以陳茂波先提出入郊野公園起樓,當民意反彈、激烈反對時,便指政府已落力搵地,無奈市民反對,將責任推得一乾二淨。
梁振英、陳茂波、張炳良及一眾梁粉,夾手夾腳推高市民對資助房屋需求,原本不屬政府優先處理的單身年輕人,也要納入政府扶助範圍,居屋轉售放寬,未見其利,先見其弊,推高二手居屋樓價。工廈改造成住宅政策,又忽然告終。梁振英自97年起已主導香港房屋政策,十幾年經驗,點解好似今日先知道土地由開拓、平整成熟地,需要一段時間造地。又點解好似今日先知道城規制度,土地規劃、改變用途、改變限制,全部需有法定程序,有上訴途徑。其實講到尾,只因為佢一開始罔顧現實,為咗選舉而亂噏,奇就奇在當時不少傳媒中人,學術精英信以為真。
可以預言搶高爾夫球會用地,最終只會不了了之,而原本上屆已諮詢在維港以外進行填海造地,在陳茂波、黃錦星一眾低水平低民望政客手上,唔「禍」都會搞「禍」。民粹式施政,就係見風駛隽,東搞搞、西搞搞,邊度有水抽,就搭嘴講兩句,議員問到軍事用地,就搭嘴抽抽水,環保組織提到高爾夫用地,又搭嘴話研究,冇政策就靠把口搭夠,講咗當做咗,自我感覺良好。
良政善治,唔單只聽從民意,仲要細心經營,做好政策,反覆論證,吸納相關人士意見,完善執行細節。梁政府重回老董時代浮誇風,其實真正躁動是梁振英,急於求成,以短期行為作施政規劃,想挽回民望。
又急又亂,已成為新政府典型作風!

添馬男

熱血青春電影《狂舞派》席捲今夏,柒良同阿花嘅夢想去盡未?
男女主角聯同導演黃修平齊上《亂噏24》,動Live預埋你!
http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載