蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年09月18日
馬上成為壹會員

智取大市:
中海發展雙底冇得衰 - 晉佳

中海發展確實衰無可衰,相信長線已經輸極有限。圖為董事長李紹德。 資料圖片

內地趁美國退市,大搞人民幣國際化,個上海自貿區搞到㷫烚烚,下一步美國為咗防止人民幣太快完成自由兌換,而搶佔美元市佔率,可能將退市步伐減慢,利用美元弱勢阻止人幣開放進度。薩默斯墮馬,唔知會唔會同上述情況有啲關係,但可以肯定嘅係,美國呢一刻放慢退市步伐,肯定有着數,一嚟可以試圖突擊人民幣,二嚟可以幫到美國自己經濟。

短線走勢差 趁機吸貨

喺上述前題下,加上斷估聯儲局唔敢做令美股重創嘅事情,再加上收水第一波肯定小試牛刀,動作一定唔大,所以周三公佈嘅議息結果,相信最悲觀都只係符合市場預期地每月減買債100億美元,再多都起碼要留番下次先做,甚至係減買債額最終少過預期。以市場演釋薩默斯墮馬嘅反應,顯示市場明顯歡迎退市退得慢,所以晉佳認為短線入市值博率相當高。
至於買乜嘢,晉佳偏好大路嘢,暫時繼續揀航運股,一嚟受惠退市慢過預期,二嚟又最受惠內地經濟回穩,基本上近期港股炒作主題都會hit到。
乾散貨航運股之前介紹過冷門股金輝(137),其他都值得留意。當中,爛到嘔嘅中海發展(1138),短線由高位急回一成,如果睇日線圖MACD指標,啱啱先喺高位出現沽售訊號,其實幾肉酸,但長線走勢似乎好到不得了。
睇周線圖,最近一年喺3元醞釀雙底形態最吸引,近期成交亦有趨勢高過舊年9月、10月,睇嚟有突破頸線5.28元嘅條件。睇埋反映乾散貨航運業嘅波羅的海指數,有機會繼續升,即使股份短線技術走勢樣衰,掉番轉可以視為分段逢低吸納嘅機會。
中海發展目前係冇盈利基礎可言,上半年虧損10億元人民幣,每股虧損27.1分,大約為34港仙,皆因煤炭、鐵礦石運輸行情低迷。
事實上,內地煤炭行業面對運輸瓶頸解決,供應大增,短期內都唔會有起色,煤炭運輸自然好難翻身。
不過鐵礦石運輸嗰part今年上半年有盈利1.37億人仔之餘,你睇鋼鐵業龍頭寶鋼擒擒青加價就知行情唔錯,運輸鐵礦石分部表現應該會逐步好番。
至於油品運輸今年上半年要蝕1.17億人民幣,就算能夠改善,其實都要成功控制融資成本,先至有望轉盈。
你睇間公司要虧轉盈,仲要面對咁多挑戰,所以估值註定極度低殘,市賬率0.5倍唔夠,對於一間唔會執笠嘅公司而言,確實衰無可衰,起碼冇公司差得過佢,相信長線已經輸極有限。
中海發展股價短線相當接近保歷加通道中軸4.14元,技術上睇,理應有支持,可先試試水。

晉佳
本欄逢周三刊登

熱血青春電影《狂舞派》席捲今夏,柒良同阿花嘅夢想去盡未?
男女主角聯同導演黃修平齊上《亂噏24》,動Live預埋你!
http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載