› 選擇地區
三藩市
紐約
洛杉磯
其他美國地區
香港 台灣 北美
 
2013年09月19日

中門大開:互借東風抽乾水 - 添馬男

黨報引述港媒報道,指回歸後英國軍情六處間諜滲透全港重要部門、傳媒、商會。

為配合政改及反佔中鬥爭,黨報引述港媒(即係文匯及大公兩篇署名文章)報道回歸後英國軍情六處間諜滲透全港重要部門、傳媒、商會,又指麥齊光被揭騙房津乃來自英特工手上情報,又指陳方安生、黎慶寧乃英國棋子,文章講到似層層,好得人驚!

軍情六處幫狼英?

首先,香港有英美特工存在係基本常識,唔好扮純真,大驚小怪,長期以來香港係東西方角力諜報中心,軍情六處有人員派駐香港,指揮政治部監控左派親共人士,港督麥理浩在抗日時在汕頭從事敵後情報工作,二戰後曾派駐布拉格,59年來港出任栢立基政治顧問,從倫敦公開五十年代港英政治部報告所見,審閱報告後簽名是麥理浩招牌式樣「大M」,之後67年曾做過越南大使,在越戰中與美國緊密合作。麥理浩就係冷戰時代英國具帝國視野、情報、外交、行政集一身的人才,任務係阻止中共在香港滲透。67暴動後出任港督,將早年出任政治顧問時「民生抗共」戰略付諸實行,造就了香港大建設時代。
七、八十年代政治部監控對象眾多,不限於左派,港大社會派學生,中大學運積極分子,如前匯豐大班鄭海泉也曾被監視,梁國雄當然有份,壓力團體成員觀察社陸恭蕙、胡紅玉也有份。九七主權移交後,英方情報人員亦會留港,當然也有親英勢力留在司法、紀律部隊、商界、學術界及公務員。但由此推論麥齊光事件、倒梁及佔中由軍情六處情報人員策動就好奇怪。麥齊光乃林鄭頭馬,協助政務司司長掌控土地資源,打倒麥齊光對邊個最有利,只要睇邊個接任就一清二楚,接替者乃梁振英頭馬陳茂波,唔通軍情六處幫緊梁振英?
而霍德及顧汝德兩人過去十幾年已被左派圈子視為軍情六處特工,講到佢哋神通廣大。最近顧汝德在訪問中公開回應,笑問如何一邊做全職中策組顧問,又一邊做地下情報工作 。除非兩人是國產007,慌死冇人知佢哋係特工,大搖大擺,來香港搞飯局做串連,倒梁佔中。按常識推測,若顧汝德係有份策劃佔中之特工,佢會就佔中公開表態咩?咁高調做乜?至於反國教運動,大家唔好以為搞政總集會需要軍情六處特工協助,阿牛、支聯會義工及教協已經熟手。03年七一遊行及之後包圍中環,當時也被視為有英美勢力策動。
其實夏千福也好,Hugo Swire也好,都想借普選抽水,扮做嘢,英美同中國冇根本利益矛盾,英國尤其睇重「人仔」。而挺梁陣營則想借英美抽水行為,拉高政治矛盾,逼所有建制派歸邊,尤其是當佔中被定性為由英美外國勢力操控,涉及國家安全,領土完整,民族統一,咁大頂帽笠落嚟,邊個頂得順?

添馬男

熱血青春電影《狂舞派》席捲今夏,柒良同阿花嘅夢想去盡未?
男女主角聯同導演黃修平齊上《亂噏24》,動Live預埋你!
http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載