› 選擇地區
三藩市
紐約
洛杉磯
其他美國地區
香港 台灣 北美
 
2013年10月06日

趣BLOGBLOG:集郵式炒股 大包圍咪換馬 - 股榮

騰訊今年升到離晒譜,但卻越戰越勇。

早前跟一位前輩碰面,講到今年炒股的精髓,就是集郵式大包圍買齊一套強勢板塊。股票換馬(Stock Switching)是一項難度高的動作,好多人都懶醒以為自己係畢菲特,能夠「低買高沽」,然後買入另一隻自以為好抵股票追落後,結果新不如舊,睇到眼火爆。

買中三隻科網股回報和味

每個行業總有一個爆發周期或低潮,兩三年前資源股炒到上天,今年則斯人獨憔悴,強迫要在弱勢板塊中揀股,認真戇居。輪到今年持續強勢的濠賭及科網股,買中長揸肯定贏錢,但每個人總有個心魔,認為升到「咁上下」,應該會唞吓,輪到二三線追落後,殊不知換來換去,白做一場,這是投資者的通病。
跟紅頂白是投資市場不二法則,科網股今年重現千禧盛世,如果阿里巴巴並非挾數千億市值,亦不會造成如此爭議。大家以為往績市盈率接近50倍的騰訊(700)升到離晒譜,但卻越戰越勇,其他同業同樣受惠,金山(3888)及網龍(777)今年升幅更超過一倍。買齊三隻,平均回報1.5倍,值博率好過買完一隻換過另一隻。
六隻濠賭股今年回報差異大,由最差的27%至最好的138%,唔識買揀中澳博(880),雖然都贏錢,但心裏應該好難受。買齊一套六隻,平均回報75%,絕對不賴。

弱勢煤炭股一隻夠輸死

今年是炒股年,恒指升幅只有數個巴仙,但逾千五隻股票,升跌比例只是約一半半,揀板塊(Sector),理論上點都容易過揀單一兩隻股票。先旨聲明,並非要大家將雞蛋放在同一籃子裏,只是叫大家將一注錢分佈在數隻同一強勢板塊上,對於弱勢板塊,要避之則吉,以煤炭股為例,唔使買齊一套,單買一隻已經夠輸死。
由弱勢換馬至強勢股,股榮絕對贊成,但在強勢板塊內不斷換馬,卻是多餘動作。The trend is your friend, until it ends,每次牛去熊來,我們只能後知後覺。總結今年炒股的經驗,能賺大錢的,不是選擇太少,而是選擇夠多。簡單直接,原來是最好。

股榮

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載