› 選擇地區
三藩市
紐約
洛杉磯
其他美國地區
香港 台灣 北美
 
2013年10月07日

中環在線:東尼愛女唱Live
新碟發佈會夠墟冚 - 李華華

Mara當日現場演唱時十分投入。 麥永健攝

知名投資大師、建立天下第一倉嘅東尼(Tony Measor),喺股壇上無人不識,搵銀無數,愛女Mara Measor卻走上歌唱事業,反應仲相當熱烈。上星期五Mara唱佢第一隻個人大碟,仲開咗個發佈會,華華去睇過,現場迫滿晒人,似乎Mara嘅知名度已經有番咁上下。
現場約有接近100人,媽媽Jenny當然有嚟捧場啦,對於愛女踏上呢條咁難行嘅路,Jenny坦言:「最緊要個女開心」,仲話一家人非常親密。Mara話,佢寫歌嘅靈感好多都係源自屋企人同爸爸,希望用音樂令人更加珍惜身邊嘅人同事。Mara中學畢業後去咗埃塞俄比亞住咗一年,見到當地人冇錢但非常開心;之後去到紐約讀大學,反而見到城市人好容易因為生活而忽略身邊嘅人同事,睇嘢好容易變窄。
就喺佢剛畢業之際,爸爸中風入院,Mara話爸爸咁辛苦搵錢養佢哋,就係想佢哋四兄弟姊妹可以有更多空間追尋夢想,而佢亦好好利用咗呢個機會去尋夢,所以毅然走上唱作歌手之路,至今兩年啦。

創作緊首隻廣東歌

一家人有幾親密?原來Mara每次寫好歌都會畀屋企人試聽,屋企人亦好真心咁唔係次次話好聽,所以每當家人話鍾意首歌,Mara就非常滿足。Mara仲話,一路唱開英文歌嘅佢嚟緊仲會試寫第一首廣東歌,仲完成咗半首啦。
有冇喺爸爸身上學番一招半式投資或者理財呢?Mara就話冇啦,但學到爸爸要好好利用資源做自己想做嘅嘢,更加學識好好珍惜自己擁有嘅嘢。
至於大家好關心嘅東尼近況,Jenny同華華講,雖然東尼四次走近鬼門關,但最近狀況穩定咗好多,出事後仲令一家人建立更好關係,識得互相扶持,所以東尼嘅擁躉唔使太擔心啦。

李華華
mailto:LiWaWa@AppleDaily.com

足本收睇《亂噏24》x 卓韻芝;緊接歡迎「宇宙最強」甄子丹!
周一至周五《亂噏24》預埋你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載