› 選擇地區
三藩市
紐約
洛杉磯
其他美國地區
香港 台灣 北美
 
2013年11月13日

中門大開:分崩析離 - 添馬男

身為政務司司長的林鄭一直迴避表態,其實都唔好得過林煥光幾多。

林煥光兩面不是人,只因太過精叻,水其實唔應該咁抽。
如果你冇份參與決定就話啫,自己有份決定,𠵱家又走出嚟批評集體決定,好冇道德,大家唔鍾意梁振英,但都唔代表林煥光抽水行為正確。曾鈺成日前出席活動時稱:「有關發牌的決定,是行政長官會同行政會議的決定……決定作出之後,所有行會成員都要負責,這是事實。我就覺得,如果需要檢討,整個行會都要檢討。」一矢中的,世界冇咁多免費政治午餐食。

行會變城市論壇

如果在香港從政,只要得閒在鎂光燈下發表政見,投市民所好,呢個模式由八十年代地方行政改革,區議會引入選舉開始,大大話話都三十幾年,如果從政就係咁簡單,呢份工真係筍到無倫。
姑勿論閣下用乜嘢心態加入行政會議工作,抽水好,攞民望好,都要受集體負責制所規範。如果閣下對決定唔認同,就只可以在討論過程中據理力爭,一旦集體作出決定,就一定要歸隊。如果決定牴觸自己政治信念,就要先請辭,離開行會後先至發表自己個人觀點,屆時你鬧到梁振英狗血淋頭都得。
外國政府執政內閣,當首相決定違背自己信念,閣員請辭是常態。當年英國工黨貝理雅首相支持攻伊,外相郭偉邦反對,最終請辭。
遊戲規則就係咁,冇話你想點就點。林煥光乃行會召集人,不恰當地公開評議特首會同行會決定,罪加一等,此例一開,行會就變咗城市論壇,冇掩雞籠自出自入,人人變身sound bite王,個個勁過王國興。如果咁筍,呢個位幾時會輪到你林煥光做。
政務司司長林鄭月娥一直迴避表態,又係唔知想點。政策乃經由佢做主席之政策委員會通過,佢一樣有份參與決策,三司都有份畀意見,𠵱家閃開,一樣有欠政治道德。發牌事件顯示新政府上任至今15個月以來,仍然各自為政,根本冇一個管治團隊嘅精神可言。一旦遇上稍有爭議性的決策,政府完全冇力去master成件事,穩定局面,應付傳媒、議會黨派之間嘅角力。
最新民調出來,梁振英民望再創新低,越來越多政府中人會有林煥光式思維,大家唔肯為梁振英而整污糟自己,𠵱家官民對立,民眾不信任政府,郁啲就互相搏拳,邊個黐埋去都會有損傷,唔做smart ass就笨。
呢種集體心理正在蔓延,由政務官開始,擴散至司局長、行會、建制派,如此下去,實在好難再管!

添馬男

足本收睇《亂噏24》x 楊千嬅;緊接落嚟 Miriam 繼續同你談談情, 吹吹水!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載