› 選擇地區
三藩市
紐約
洛杉磯
其他美國地區
香港 台灣 北美
 
2013年11月19日

中環在線:大家樂義賣禮包慶生
羅開光下月唐裝開派對 - 李華華

大家樂CEO羅開光(右)及「食德好」行政總監鄧燕梨一同為活動作宣傳。 麥永健攝

大家樂(341)早排慶祝45周年,限量推出1蚊懷舊金沙骨、蝦多士,可惜只得幾間分店有售,唔係人人食到,再來慶祝活動第二擊,就差唔多全線140幾間分店都有份,仲要係做慈善。

收益買餐券予慈善組織

大家樂同減廢組織「食德好」合作,加埋一班供應商,推出近2.6萬個禮包,今日開始喺大家樂分店義賣,每個20蚊,收益全部用來換大家樂餐券,再交畀「食德好」轉派畀慈善組織,幫助失業或其他有需要嘅人士。
大家樂CEO羅開光(Sunny)話,餐券可以換大家樂嘅皇牌系列食品,包括焗豬扒飯、四寶飯等等,包埋飲品。大家樂一向都有定期送餐券畀慈善團體,Sunny話,今次想讓顧客有份參與,一齊做善事。
禮包裏面有蠔油、護髮用品、即沖咖啡等等,都算實用。Sunny話,禮包嘅價值大概60蚊,差價由大家樂同禮品供應商分擔,估計活動約籌得45萬元。若反應好,明年初將會推第二階段,到時再擴大參與層面。
講起慶祝,大家樂早排搵代言人胡孟青着番套舊制服現身已經好爆,原來咁都唔止,大家樂下月7號再搞化妝派對,又係玩懷舊,以六、七十年代為主題,咁咪要着喇叭褲、鬆糕鞋?Sunny打算着唐裝衫上陣喎,真係睇唔出佢可以咁激,咁玩得,唔知青姐到時會唔會以陳寶珠造型現身呢?

李華華
mailto:LiWaWa@AppleDaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載