› 選擇地區
三藩市
紐約
洛杉磯
其他美國地區
香港 台灣 北美
 
2013年11月19日

中門大開:政客續命術 - 添馬男

李慧玲(右)今日被調離《在晴朗的一天出發》,他日又將會有新敵人出現。 資料圖片

傳媒願意接受政府伸手影響新聞編輯,其中一個傳統理由係只要維持良好關係,政府會提供回報,凡有重大事件及決策,會用權威消息人士身份放料,比其他媒體搶先一步。呢個遊戲之所以存在多年,係因為過往的而且確互惠互利,但正如政府過份高估名嘴影響力一樣,呢類親建制傳媒對社會嘅影響力,也在持續下降。
內地官員誤以為香港媒體環境「惡劣」,人人針對梁振英。但現實上細心諗諗,由電視、電台、官媒到主流報紙,未計左報系統,每日由朝到晚,批評政府嘅聲音有幾多,數來數去就不外乎一報一刊一支咪,從量而言乃一與九之比,但點解政府仍然視傳媒為頭號政治敵人呢?
答案好簡單,有平台冇內容就冇用,今日IT產業內容是撒手鐧,同樣政治角力,內容亦係No.1。即使再封多十支咪,政府都唔會認為足夠,冇咗朝早李慧玲,就有新敵人出現,聽聽下連二台林海峰都好似寸寸貢喎,夜晚陶傑又唱衰中共小農DNA,行會內自然有人提出機不可失,借續牌一次過收多兩支咪。我可以保證,就算連潘小濤節目都收埋,特首民望只會更低。
有平台冇內容,源於政府政治論述能力低,連deliver一條正常小小嘅line to take能力都欠奉。原因不在新聞處,今日新聞官已不會主動放料,問題在於梁粉新貴陳茂波憑甚麼可以凡事為特首出謀獻策,笑死人。

小圈子化降低論述能力

當政府決策越小圈子化、黑箱化,政府開會討論氣氛就越沉悶呆板,有睇法、有判斷力,最重要有實戰經驗嘅官員就會明哲保身,由頭到尾低頭唔出聲。呢種政治氣氛直接導致政府論述能力下降。當你越來越多低B言論出台,對家就越多機會入位砌你,道理就是如此簡單。
由始至終,傳媒不過係落後政客失敗最佳藉口。鄧忍光成功清除吳志森,廢了港台在時事影響力,梁振英民望理應有所進步,當仍持續下降時,惟有又找尋另一個盲毛孭飛,港台官方訪問節目條花𡃁麥嘉緯好寸嘴喎,於是又發現一個盲毛。如是者政客的政治生命又得以延續,報告中央時又多一隻替死鬼。

添馬男

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載