› 選擇地區
三藩市
紐約
洛杉磯
其他美國地區
香港 台灣 北美
 
2013年11月19日

東涌居民:地點隔涉 空氣差

東涌昇薈距離港鐵站要20多分鐘步程,或可選搭機場巴士途經該處。  黃偉傑攝

【現場直擊】
南豐的東涌昇薈臨海而建,鄰近未來港珠澳大橋,綜合街坊意見,總共有三大缺點,包括地點隔涉、交通不便和空氣欠佳。對於該項目開價,有街坊直言:「𠵱家屯門樓都賣成萬蚊呎,合理呀!」
記者現場直擊,由港鐵東涌站行去昇薈地盤,穿過東薈城,途經水藍.天岸,走進公園,跨越單車徑,全程20多分鐘。若選擇駁車,可在東涌站附近的巴士,乘往機場巴士途經此地。映灣園住戶普遍選坐該屋苑專供住戶乘坐的穿梭巴士往來港鐵站。
東涌水藍天岸居民陳先生表示:「這裏認真好住,尤其適合我哋退休人士,無咁煩囂……行去地鐵站約15分鐘,可以接受啦……」一邊訪問,頭頂不停有飛機「烘烘聲」飛過,陳先生表示:「飛機唔嘈,就算開窗都唔嘈,不過我單位向山,絕對無影響,向海,我就唔知啦!我唔敢武斷。」
對於飛機嘈音問題,街坊各有見解。東涌海堤灣畔居民莫小姐表示:「可以接受,等於久而不聞其臭嘅道理,習慣咗,就唔覺囉!」對於該盤開售價,她表示:「點開價都不會考慮,因為政府太多政策,包括雙重印花稅、三年內易手要交稅,局限咗我哋,所以幾多錢對我來講,無乜所謂,最緊要買嘅人覺得有需要和合理。如果實呎1萬元,𠵱家屯門樓都賣成萬蚊呎,合理啦!」
東涌水藍.天岸居民古太表示:「以前我住映灣園向海,就會嘈啲囉!平時都瞓得著,但個人心情唔好,就會覺得嘈。」古太又指出,該區空氣質素差,「因為近機場,空氣無咁好,係呢邊住得耐,搞到有鼻敏感、氣管差,以前住青衣、屯門都唔會話有呢啲問題。呢度住咗5、6年,近期前面地盤(昇薈)動工,空氣更加唔好。」

相關新聞:實呎$7,671 昇薈平絕東涌首批318伙 折實331萬入場

來回市區車費太貴

此外,東涌站往來市區約半小時車程,然而部份居民覺得車費貴。東涌逸東邨居民劉太表示:「搭車去市區真係好貴,成20蚊,來回都成40蚊,夠我買餸喇!」

東涌街坊意見

【開價太貴】
陳先生: 「樓盤開價貴,冇辦法啦,地價貴、建築費又貴,不過我相信有市場嘅!」

【有鼻敏感】
古太:「因為近機場,空氣冇咁好,喺呢邊住得耐咗,搞到有鼻敏感、氣管都差咗。」

【交通費貴】
劉太: 「搭車去市區交通費真係好貴,要成廿蚊,來回都四十蚊,夠我買餸啦!」

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載