› 選擇地區
三藩市
紐約
洛杉磯
其他美國地區
香港 台灣 北美
 
2013年11月20日

中門大開:傳媒keeper下場 - 添馬男

志雲大師既然已整污糟隻手,有第一次,自然有第二三次。 資料圖片

陳志雲公開與節目主持人李慧玲WhatsApp內容,否認對佢施加威脅,手法都幾低。可能浸淫TVB金枝慾孽式宮廷醬缸太耐,點睇都唔似AO出身,做過傳媒管理層,似有小三情慾短訊要公開自白嘅二打六藝人。

商台CEO 負責擋子彈

節目調動、商業糾紛、顧問建議,呢類藉口都聽咗十幾年,𠵱家仲攞出嚟講,真係搵鬼信。所有事件都要put it into the context去閱讀,而唔係WhatsApp一兩句字眼。商台早有前科,十年前續牌,俞琤請來蔡東豪做CEO,原意係搵人做替死鬼,封大班及毓民咪,向董朝政府交差,蔡東豪就係今日陳志雲,當然佢比陳志雲高幾皮,在俞琤不斷施壓下,蔡拒絕執行炒人指令,代價係最終被商台炒魷。而最後俞琤硬着頭皮自己赤膊上陣,到直播室與大班公開對質,搞到自己眼鏡都差啲跌落地,成為笑柄。自此俞琤公眾形象盡毀,商台晨早時事節目無晒吸引力,用過俞琤老友施南生做主持,越做越沉,如果冇李慧玲調上去做晨早,一早根本就冇人聽。
商台接二連三發生呢種事件,不應怪責陳志雲,佢不過係替死鬼,若事情鬧大成政治事件,下一個被炒將會係志雲大師。一日有俞琤在商台,邊個做CEO都不過用來擋子彈,最終穩坐釣魚船者,幾十年來只有俞琤一人。大家有冇諗過點解?答案好簡單,為咗個牌乜都得,高薪搵條keeper就得。黑社會賣老翻,都會搵條道友做keeper去頂罪,道理有幾高深複雜?
志雲大師既然已整污糟隻手,有第一次,自然有第二三次,下一個熱門人選係潘小濤、陶傑,排住隊上。陶傑光明頂做咗近十年,應該係時候調動節目囉,最好搵件娛圈自己友頂替,專做香港娛樂咪幾好,廣告仲即刻會多咗,只要商台肯配合,自然可以分到維穩費。港人治港之所以成為一個永遠失敗政治現象,就係因為大家有後門走,唔使做好本份。一條蛋散局長黃錦星上李慧玲節目,一定會俾人砌到散,要怪就怪梁振英點解搵埋一班蛋散做局長,𠵱家反而怪責主持人,簡直黐線。政客諉過傳媒,北京又信以為真,於是政客毋須提高自己質素,一旦出事就祭出三幅被:傳媒惡意針對,背後又有英美境外勢力,所以特區施政寸步難行……(下刪200字)。
行會內充斥住一群仇恨傳媒嘅政客,大家都有俾傳媒狙擊、批評嘅經驗,當有機會報仇時,仲點會放過傳媒人。但大家唔使太悲觀,通常郁到傳媒,已代表進入深切治療部,若政績及民望再無改善,難再有替罪羊,當中央再度問責時,屆時就輪到政客付出代價!

添馬男

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載