› 選擇地區
三藩市
紐約
洛杉磯
其他美國地區
香港 台灣 北美
 
2013年11月20日

智取大市:四大理由要追雅士利 - 晉佳

雅士利估值若要同蒙牛睇齊,至少要升到5.7元,如果高蒙牛估值一成,就可以睇6.27元。 路透社

三中全會全文提到單獨二胎,果然夠震撼,相關概念股升到爆燈。受惠嘅奶粉股裏面,雅士利(1230)目前必然係首選,近期股價強絕同業股份,就知小弟無吹水。論原因,第一,業務有強勁改善空間;第二,估值相對同業未算貴;第三,全購3.5元完成,貨乾,全無蟹貨,升得起;第四,當初3.5元搵咗唔少big name入股,包括淡馬錫同厚樸基金,幕後擺明見你係大牌先預你玩,普通hedge fund真係睬你都儍,要貨就唔該喺市場幫手掃上去!
所以上周二復牌,4元優惠價停唔夠一日,就一去無回頭衝咗上去,全購後啲貨一早收齊,都費事等你有機會買平貨。

管理層「蒙牛化」

至於5.09元夠唔夠平,答案係依然平。先講吓故仔,雅士利本身從事國產奶粉,過往一直唔受歡迎,原因係三聚氰胺事件後,內地人唔信自己人做嘅奶粉,有錢就買外國奶粉,所以雅士利只能進軍三、四線市場,之後佢話引入新西蘭奶源,準備做類似合生元(1112)嘅假洋奶業務,市場當時半信半疑。另外,遠在三聚氰胺事件當中,雅士利舊管理層勁無義氣,曾經唔肯向分銷商回收奶粉,跟住得罪咗好多分銷商,估計事件大大影響其後銷售表現。
不過,上述問題,自從蒙牛(2319)入主之後,已經成為過去。
蒙牛喺今年6月宣佈每股3.5元收購雅士利,其後仲更加換埋管理層,由蒙牛總裁孫伊萍出任主席,實行將管理層「蒙牛化」。賣奶粉,信心是最緊要一環,而自此之後,雅士利就係蒙牛嘅奶粉業務旗艦,無論係雅士利嘅國產奶粉定係假洋奶,都有蒙牛信心的保證,未來銷路肯定大踏步,加上中央有意打造國產奶粉龍頭,蒙牛旗下的雅士利點會無份?
至於業務即時正面影響,相信係同分銷商關係突然破冰,仲可以利用蒙牛分銷網絡賣奶粉,咁你話,長遠銷量有乜法子唔勁。可見將來,只要產能配合到,雅士利收入同盈利應該能夠爆發式增長。

首站目標價6.27元

論估值,經過一輪升勢過後,雅士利歷史市盈率去到30.76倍,由於收入、盈利基數低,增長潛力相比阿媽蒙牛同對手合生元更大,絕對唔算貴。如果簡單用市賬率計價,雅士利3.53倍,由於盈利潛力比蒙牛更高,所以估值可以比蒙牛貴,但蒙牛市賬率都要成3.95倍。
假設蒙牛股價唔上唔落的話,雅士利估值要同蒙牛睇齊,至少要升到5.7元,如果高蒙牛估值一成,就可以睇6.27元,晉佳將雅士利首站目標價訂喺6.27元,事實上亦算保守。由於噚日股價開始出現調整,未知整固幾耐,所以建議分段吸納較穩陣。

晉佳
本欄逢周三刊登

足本收睇《亂噏24》x 楊千嬅;影帝張家輝接力上陣!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載