› 選擇地區
三藩市
紐約
洛杉磯
其他美國地區
香港 台灣 北美
 
2013年11月20日

中環在線:超人四叔前後腳北上
唔傾投資 各做善事 - 李華華

李嘉誠噚日去咗西安,捐錢贊助當地文化教育事業。 資料圖片

城中兩大孖沙近日齊齊北上做善事。「超人」李嘉誠噚日靜靜雞去咗西安,捐錢贊助當地文化教育事業;剛捐地畀博愛嘅「四叔」李兆基就繼續慈善之旅,今日去四川為佢捐錢起嘅醫院主持開幕儀式。

超人即日往返西安

超人噚日上晝十點幾坐私人飛機飛上西安,微博仲不時有人轉發佢老人家嘅相,墟冚程度拍得住領導人出巡,聽講佢下晝去咗參觀兵馬俑,即晚飛返香港。超人今年85歲,咁飛法都咪話唔辛苦,咁佢無端端西安一日遊又搞乜呢?
唔知係咪有人一廂情願,有報道話超人呢次係去參觀節能科技研討會同埋觀光旅遊投資項目,仲有網民離譜到叫超人投資足球,實情佢係去做善事,幫李嘉誠基金會贊助嘅「展璞計劃」主持啟動儀式,捐錢提高當地女性教育同增加配套,希望佢哋學成後可以回饋農村。
四叔就今日出發去四川,事關2009年汶川大地震之後,四叔即刻捐咗8,000萬元畀重災區之一嘅廣元市,興建醫院,呢間醫院最近落成,市政府特登邀請佢老人家上去主持開幕儀式。

四叔近年經常講「錢財聚散有道」,自己捐地之餘,仲呼籲其他大孖沙一齊做多啲善事。新世界發展(017)主席鄭家純可能受到感染,噚日話捐錢捐地都會諗諗,如果個個都係咁諗,咁世界就美好得多喇。咁佢哋賣樓可否唔好賺到咁盡,等多啲小市民完成置業夢先呢?唔通賺得盡先可以行善?

李華華
mailto:LiWaWa@AppleDaily.com

足本收睇《亂噏24》x 楊千嬅;影帝張家輝接力上陣!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載