› 選擇地區
三藩市
紐約
洛杉磯
其他美國地區
香港 台灣 北美
 
2013年11月22日

滙海探戈:
歐美悶局 滙市困獸鬥 - 奇兵

IMF唱淡澳元,指現價較合理水平高出約10%。 路透社

道指本周升破萬六後,近日開始腳仔軟,未能更上層樓,反映大市今年累升逾兩成後,投資者越來越畏高,加上呢兩日又翻炒退市,個市自然窒步,估計缺乏新元素炒作下,年底前都係咁上下。
歐美金融市場近期處悶局,以美股為例,道指本周波幅僅得165點(截至周三),外匯市場亦係困獸鬥,幾隻主要貨幣都係窄幅上落。若要追尋刺激,呢期玩Bitcoin就肯定過足癮,事關呢隻虛擬貨幣近排炒到飛起,上個禮拜個價仲講緊300美元左右,點知禮拜日就升穿500美元,兩日後竟然炒到900美元,但唔夠幾粒鐘又掟返落502美元,上下波幅高逾四成,過去兩日仍喺400至700美元浮沉,啱晒啲炒友。

Bitcoin幾時爆冇人知

事實上,Bitcoin呢期咁出位,唔多唔少亦拜金融海嘯所賜,事關08年以來,歐美央行牽頭瘋狂放水救市,令到啲銀紙越來越唔見使,動搖市場對現有貨幣制度嘅信心,為虛擬貨幣帶來存在價值。
不過,正如股票一樣,就算有幾美好的故事主題,亦要天時地利人和配合,至可以令潛力發揮得淋漓盡致。以Bitcoin為例,雖然以發行量有限及難以偽造作為賣點,但虛擬貨幣畢竟是新事物,市場普遍仍有戒心,若非美國監管機構近日對其認受性予以肯定,加上強國人入市推波助瀾,個價未必會升得咁喪。由於Bitcoin今年尋升咗幾十倍,同幾年前比升幅更以千倍計,有分析擔心Bitcoin係三百幾年前荷蘭鬱金香泡沫狂潮嘅翻版,即係最終可能跌到渣到冇,但到底幾時至爆就真係天曉得。
正如上周所講,如果以主席伯南克嘅說話作準,儲局計劃年底啟動退市、年中停晒買債行動嘅退市方針從未變改,但市場往往根據儲局官員嘅言論進行炒作。以本周滙市為例,聯儲局周三公佈嘅上月會議紀錄顯示,若經濟情況許可,儲局仍傾向幾個月內開始縮減買債,令市場覺得少少意外,又再翻炒下月退市,美國10年期債息抽上2.8厘。

日圓未跌完 續睇103

雖然美元噚日升番少少,但兌各主要貨幣其實仍處於近期嘅橫行區間。歐元兌美元喺1.33至1.35上落,英鎊企係1.6至1.62美元之間。日圓就一如上周所料繼續偏軟,美元兌日圓逼近101,創四個月新高,短期應該仲有得去,維持睇103嘅目標。
另外,IMF唱淡澳元,話現價較合理水平高出約10%,加上內地製造業PMI數據欠佳,澳紐元本周表現相對失色,澳元低見92.56美仙,紐元險守82美仙,但呢啲位上個禮拜都見過。
值得貿意嘅係,如果儲局短期落實退市,黃金等以美元計價嘅商品應該仲有壓力,到時澳元可能面對更大壓力。

奇兵
本欄逢周五刊登

足本收睇《亂噏24》x張家輝;宅男女神謝安琪隆重登場!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載