› 選擇地區
三藩市
紐約
洛杉磯
其他美國地區
香港 台灣 北美
 
2013年11月25日

中環在線:
瑞房周身債 分拆未去馬
羅康瑞好頭痕 - 李華華

羅康瑞呢排應該好煩,無論係做公職抑或是私人業務都唔如意。

機管局「梁粉」董事羅康瑞上周二召開記者會承認,因與機管局主席張建東意見不合,辭任旗下基建規劃委員會主席,查實羅康瑞何止喺機管局碰到一鼻子灰,佢旗下瑞安房地產(272)一直未能分拆新天地上市集資,借落嘅債務,每年利息支出唔細,佢都要不停諗計。

引入基金 冚數還債

瑞房舊年5月已經遞表申請將新天地分拆上市,可惜股市氣氛欠佳,據聞市場要求新天地作價較資產淨值大幅折讓50%或以上,羅康瑞唔肯制,於是一直上唔到市。
瑞房上月底突然引入基金Brookfield,對方買入新天地5億美元(39億元)可換股永久證券,咁啱瑞房下月底有一筆30億元人仔嘅債券到期,兩件事好似發生得啱啱好,瑞房亦講明,呢次交易所得資金部份用作還債。
翻查年報,瑞房舊年利息開支總額24.9億元人仔,利息覆蓋率(interest coverage ratio)只得0.6,呢個數低過1.5已經要留意,低過1真係不得了。
據了解,瑞房預算今年利息開支約27億元人仔,賣咗批可換股證券畀Brookfield,雖然攞到筆錢,但係要畀息,加埋原有債務,明年利息開支約26億人仔。
對於投資銀行來講,瑞房上唔上市都冇所謂,投行幫瑞房做債券、可換股債券,幫間公司再融資,一樣有生意做,只係難為瑞房掌櫃睇實盤數,確保還到利息,又難怪羅康瑞今年5月都話要出山啦。

李華華
mailto:LiWaWa@AppleDaily.com

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載