› 選擇地區
三藩市
紐約
洛杉磯
其他美國地區
香港 台灣 北美
 
2013年12月17日

中門大開:曾鈺成釣魚大計 - 添馬男

人人識睇梁振英弱點去sell北京,你曾鈺成知道,其他人一樣知道。

曾鈺成接受《經濟日報》訪問,將其king fishing大計公諸於世,同一時間,馬時亨、唐英年亦為梁錦松重出江湖造勢,表態支持阿松參加2017年選特首,仲有身負政改諮詢大任嘅林鄭,乖仔、老公由英倫祖家回歸,又回內地中山置業,一改以前「裸官」狀態。大家都已經將梁特首write off,當正佢已落咗台,全力為謀取下屆王位部署,當中以曾鈺成計劃最為清晰。

西環取態屬最大關卡

曾鈺成向報章透露,自己正籌組一個「穩定、有規模、經得起朝代轉變」的智庫組織,作為人才庫,提供政治問責人才,供日後特首揀蟀,改善政府管治。呢個組織嘅功能本來係由政黨負責,但睇怕北京唔會容許政黨執政,所以先至要另起爐灶搞一壇「fishing club」,變相提早埋班,組織一個專業政治聯盟,唔理你邊個選贏,背後組班都係由呢個智庫提供。
此概念並不新鮮,當年曾蔭權時代嘅智經,就係prototype,從智經嘅成與敗經驗,就可知道曾鈺成呢個「釣魚會」得定唔得。
要做到香港本土建制派政治聯盟,成為穩定支持特首嘅管治力量,最大嘅hurdle係西環取態。當年智經係威係勢,協助曾競選成功,之後便有所謂西環與中環之爭。中環者,乃官僚勢力、主流商界、傳統港英建制主流,但就冇「侵」西環友,結果傳媒就爆出中環與西環之爭,最終邊個贏出,大家都估到晒,當然係西環跑出。
無他,邊個手握政治賞罰機制就有話事權,如果曾主席有霸氣,能決定邊個建制派人士出選、入閣、出任公職,自然就可以做到king maker又或者fishing king。問題係如當年智經一樣,只做到政策研究及networking呢part,當時智經主席陳德霖為曾助選成功,晉身大內總管,即特首辦主任,謀劃擴大問責制,向政府輸送政治人才。但智經欠缺唔係錢及人脈,欠嘅係政治力量,冇自己政治班底,去倡議一套政治主張。
要成功做到fishing king,實在唔容易,因為覬覦呢個fishing位嘅人實在不少。正因為通街都知梁振英冇戰友冇朋友,起用一棚古靈精怪人士,以鬥爭思維去管治,分化建制勢力,人人喊打,於是紛紛提早埋班,睇住梁振英弱點去sell北京,你曾鈺成知道,其他人一樣知道。
幾條水人馬搶造fishing king,除非曾主席有北京加持祝福,表示呢檔係獨家獵頭代理人,咁就可以突圍而出。

添馬男

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載