› 選擇地區
三藩市
紐約
洛杉磯
其他美國地區
香港 台灣 北美
 
2013年12月17日

智取大市:京客隆殘股博翻身 - 晉佳

假如京客隆能夠重現強勢,中長線可望升至4.5元。  互聯網

港股近5個交易日跌咗4日,高位跌咗成千點之餘,三中全會到𠵱家嘅升幅已經唔見咗一大半。如果要再深入啲睇市場對於三中全會與中央經濟工作會議嘅反應,就應該集中睇H指。
由三中全會全文內容見光之前嘅11月14日收市價10391計算,H指去到12月2日升到去高位11638,以黃金比率計算,只要調整幅度維持喺0.618倍之內,仲算係反映三中後H指升勢未被破壞,即係10867屬於升浪支持位。如果明顯跌破咗呢個位,就當係market話你聽三中全會冇觸發中資股升浪,所謂三中帶嚟重估浪潮,就忘記佢罷啦。
事實上,H指連續兩日守到10867,仲要唔敢講可以守得穩,所以中資股強極真係有個譜,相反資金仲係炒緊濠賭股,板塊越炒越窄,噚日升跌股份比例4:9左右,唔似好兆頭。
恒指9日RSI跌到30.82,事實上港股升浪途中,9日RSI跌近30,已經算係一個警號。而9日RSI由9月中到𠵱家形成一浪低於一浪嘅走勢,中線走勢開始有轉弱迹象。不過,聯儲局就快議息,加上RSI偏低反而有短線超賣反彈誘因,所以短線仲可以觀望一吓,當然不能期望過高。同樣值得留意嘅係,如果恒指喺年尾維持呢個位收爐,月線圖又變番陰燭,仲要回落番去原本已經突破咗嘅三角形阻力線(23500)樓下,後市就唔值得咁進取。
升股買少見少,晉佳經驗告訴自己,要賺錢反而要喺冷門股埋手,近排見到聯華超市(980)升得靚仔,睇吓相關板塊股份,的確唔講得笑,佢同埋做大賣場嘅京客隆(814)一樣,今年第二季到而家形成咗圓底形態,有機會長線大翻身。

中長線上望4.5元

先講京客隆,佢今年上半年收入上升5%,但營業費用增加得比較快嘅關係,令純利下跌38%至4,837萬元人民幣,每股盈利12分。第三季表現仲差勁,單季只賺607萬元,斷估今年市盈率會超過10倍,但市賬率只有0.6倍,估值仍低殘。不過,好就好在收入穩定上升,暫時都未驚公司會scale down,只要收入唔轉跌,股價照計跌極有個譜。
三中全會有一個好重要嘅訊息,就係要公平、市場化、打破中等收入陷阱,如果要打破中等收入陷阱,起碼要普羅大眾都有能力消費,如果中央有心力谷低端消費,照計京客隆呢類超市股,長遠表現應該唔會太差。
圖靚加埋估值低殘,相信係買入京客隆嘅原因。近兩、三年呢隻股已經跌咗七成,股價往往受制於250日線,目前250日線只係3.1元左右,呢個位同時係雙底頸線,向上突破就一天光晒。雖然長線未確認轉強,但晉佳仍建議分段吸納呢隻股,如果真係重返強勢,中長線至少上番4.5元。

晉佳
編按:智取大市暫代板塊尋寶一天。

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載