› 選擇地區
三藩市
紐約
洛杉磯
其他美國地區
香港 台灣 北美
 
2013年12月20日

中門大開:特首三規 - 添馬男

北京要梁自篤背脊目的只有一個,就係要約束梁振英權力。

一切似曾相識。港澳辦主任王光亞今日見完梁振英後,向傳媒講解為何要規範化特首述職內容,係要求特首報告不足之處,而非只匯報成績,以及如何落實《基本法》。簡單講,係利用述職報告要求梁振英查找不足!北京目的已寫在牆上,畫公仔畫出腸,問你梁振英死未!
如此重要決定,一定要將光亞叔原文照錄:「我們更加進一步明確就是說,這些匯報的內容應該是包括哪些方面,過去可能更多是講一年我做了哪些成績,現在我們也要求他(特首),你要找到不足,這一年的工作上有甚麼不足,也包括新的一年裏面你有哪些新的規劃哪些新的事情要做。這樣的話,把述職的內容更加確定下來。」
即係規定時間、規定地點、規定內容,特首要將特區狀況坦白向中央交代。
眾所周知,述職本來象徵意義大於一切,宣示一國兩制下特首向中央負責嘅儀式,內容亦係務虛唔務實,泛論一般形勢,如有大鑊嘢,就另開一段匯報,始終主動權在特區呢一邊。今次規定內容,仲指定要查找不足,將述職主動權攞番,冇得再任由梁振英Spin中央。維園阿伯都睇得出,中央已對梁失去信任,因為北京要掌握梁治下不足地方,使鬼要佢在述職中匯報咩?即使中聯辦唔報,仲有人大、政協、大孖沙、建制黨派可以上報中央,篤佢背脊。
北京要梁自篤背脊,目的只有一個,就係要約束梁振英權力,意思係你唔好以為基本法賦予你大權,你就可以亂嚟,將權用到盡,或者選擇性運用,以鬥爭為綱,搗亂香港,我係贒實你梁振英㗎!

建制派隨時捉痛腳

大家諗吓,講到明要你自摑,即使閣下面皮厚過乜,亦會感受到好大壓力,不斷盤算應該報啲乜,中央究竟掌握幾多呢?報少咗又會唔會俾人公開再摑呢?而對梁敢怒不敢言之建制中人,也會積極配合中央,一年365日協助中央收集梁「不足材料」。如此狀態下做特首,不如罷了。
已婚男士北上後,返屋企老婆黑口黑面,男士千方百計賣口乖,老婆大人冷冷一句:「做過乜嘢,你自己心知肚明!」男人此時呆一呆,不斷盤算究竟認賭波、揼骨、定去東莞淫K,抑或自爆黃貝嶺包養小三阿翠花呢?究竟老婆知道幾多呢?如果揭出講大話,會唔會仲大鑊,講真話,又有冇數可講呢?
日日都處於此種狀態,人都癲,難怪梁特首個頭越來越大,電視所見,面容浮腫。唉!正所謂禍兮福所倚、福兮禍所歸,機關算盡登位一年多,又點估到今日。只因當初佢「計算」嘅,係共產黨!

添馬男

有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載