› 選擇地區
三藩市
紐約
洛杉磯
其他美國地區
香港 台灣 北美
 
2013年12月20日

滙海探戈:一言九鼎 伯南克好嘢 - 奇兵

儲局落實退市,消息刺激美元兌日圓昨日一度升上104.36,創逾五年新高。  路透社

擾攘半年,美國聯儲局周四終於落實,明年1月起每月減少買債100億美元,將放水規模縮細到750億美元。雖然事前過半數人估儲局唔退住,對市場而言算係爆小冷,但會後聲明派定心丸,暗示零息環境仲有排玩,美股禮拜三喪升近300點,歐洲股市噚日亦跟隨上升,惟獨亞洲股市表現一般。
儲局今次會後聲明,對美國經濟前景嘅看法比上次樂觀。於最新季度經濟展望當中,將未來幾年嘅通脹及失業率預測向下調,其中失業率就估計於明年回落至6.3%至6.6%,後年就會跌穿6%,對未來兩年嘅增長預測就冇乜點變。
會後聲明提到未來幾次會議都可能繼續漸進式收水,但強調冇預設時間表,會以經濟狀況為依歸。而為咗令市場放心,會後聲明仲清晰講明,若低通脹情況未改善,就算失業率跌落6.5%嘅加息門檻,近零息的超低息環境會維持一段長時間,而據儲局季度報告顯示,絕大部份聯儲局官員預期2015年先開始加息。
值得留意嘅係,聯儲局出年1月底議息,雖然伯南克仍然在任,但由於下次會議冇記者會,所以前晚記招應該係佢任內最後一次以儲局主席身份會見傳媒。
會上有記者問佢之前話打算年底開始退市,出年年中停晒QE,前一個意向就兌現咗,之後嘅退市期限有冇變,伯南克就話若然經濟狀況符合預期,儲局傾向於明年每次例會中按同一步伐縮減買債,即係每次開會買少100億美元,年底就會game over。當有記者問佢今次退市決定同換班有冇關,佢嘅答案係冇,但強調事前已經徵詢接班人,即現任副主席耶倫嘅意見,而後者都完全支持佢嘅決定。
雖然伯南克喺記者上亦認錯,話對金融危機嘅警覺性不足,發現得太遲感覺有啲遺憾,但個人認為佢喺金融海嘯後做得非常好,最值得一讚嘅係,各儲局官員近半年對幾時退市嘅立場經常左搖右擺,令市場無所適從,但作為舵手嘅伯南克,傾向年底開始退市嘅立場冇變過,結果亦真係言出必行。

儲局收水 金價未跌完

至於匯市走勢,由於儲局落實退市,美元兌各主要貨幣普遍向好,首當其衝嘅當然係貨幣政策背道而馳嘅日圓,美元噚日已升上104.36日圓,創逾五年新高,雖然儲局會議息結果公佈後,美債孳息變動不大,但儲局逐步收水勢在必行,息差因素驅使下,除非出現股災等黑天鵝事件,否則日圓唔係咁易翻身,中線睇110唔係太難,金價噚日亦跌穿1,200美元關口,創近半年新低,短期應該繼續冇運行。
至於兩周前建議開嘅加元好倉,因為形勢有變決定取消。其他如歐元及英鎊就難睇啲,估計短期上落格局,上周建議嘅紐元兌澳元交叉盤就繼續去馬。

奇兵
本欄逢周五刊登

足本收睇《亂噏24》x DADA陳靜;跟住有嘉玲姐駕到!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載