蘋果日報 | APPLE DAILY
› 選擇地區
三藩市
紐約
洛杉磯
其他美國地區
2013年12月30日

中門大開--
清算2013:打假波 - 添馬男

香港人唔多關心屯門假波事件,但若政府管治都是如此,就不得不關注。

當2013過去,2014會更好,定係更壞?大家心中有數!
2003年,香港人唔開心,係因為失業、貧富差距、負資產再加沙士、廿三條,2013年上述情況乜都冇出現,香港人唔係擔心現在,而係為未來憂慮。一切源於梁振英上場,背後其支持勢力,不為港人熟悉,也用咗一套非主流政治手段,協助梁管治,令本地主流民意大反彈,連帶摧毀市民對整個政府及中央嘅信任,元朗黑色鄉紳、小桃園勢力、愛字頭赤衞隊、警隊政治化,一切一切都令香港人難以忍受,過去30年未曾出現之惡質政治。

屯門引入多名內地球員

呢種非主流政治力量,無視本土政治潛在共識及規矩,而梁振英也要高舉打倒曾蔭權政府嘅旗幟,逢曾必反,連帶佢所代表嘅政治主流也全盤否定,此舉將香港建制嚴重撕裂,後果嚴重。
2013年將盡時,香港甲組足球爆出屯門涉打假波事件,主流傳媒當作笑片花絮,但大家只要細心分析屯門足球隊,切片化驗,就會知道香港淪落嘅前因後果,「打假波」實在係2013年最有代表性之政治新聞。
屯門球會2011年由廣東省政協陳強任會長,但陳強於2012年的立法會選舉中出現賄選風波,他宣佈撤資,球隊出現財政困難。舊年在中間人扯線下引入內地青島資本,巴西外援丹尼爾、比圖和迪高等人離隊,改由內地中超球隊青島中能引入四名內地球員:馮濤、胡俊和張夢等,球迷早已冊封屯門為「新香港人」球隊,因連同四名來自青島球員,加上凌琮、謝思利達和李明等人,全隊共有七名球員為內地來港。球隊表現差劣,積分榜上排尾二。究竟搞呢隊波為乜?
假波事件係當時與橫濱FC作賽,補時階段仍打成平手,完場前橫濱開出角球,防守之屯門內地球員李明竟然衝頂入自己龍門,整個動作唔似偶然,令人譁然。
足總介入調查,屯門足球隊卻突然發出聲明,單方面終止與其球隊管理公司合作,同時取消所有屯門甲組及預備組之球員及職員於香港足球總會之註冊,令一切難以追查。
香港今日政局同屯門假波事件何其相似,梁振英背後之力量,包括鄉紳、內地援兵,一切均似造假。內地足球歪風入侵香港,無視本地一套規範,明目張膽造假,香港人唔多關心,但如果連政府管治都「屯門球會化」,香港會變成點,大家應心中有數!

添馬男

足本收睇《亂噏24》x劉嘉玲; 鄭秀文@杜琪峯再度登場!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載