蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月02日
馬上成為壹會員

基金經理 圓桌會議:
炒落後還是怕改革?

基金經理對今年港股後市有不同看法,但認為去年強勢的科網股仍然有餘未盡。 黃偉傑攝

【2014年第一季】

港股去年全年升幅不足3%,中資股及A股更加倒跌,齊齊被升三成的美股拋離幾條街,今年一開始,便要面對美國聯儲局減少買債,踏出收水的第一步,而內地又強調經濟轉型多於速度,三位對沖基金經理激辯對今年後市的看法,分成追落後與怕改革兩派,絕對是考眼光的一年,但去年強勢的科網股,似乎有餘未盡。


Tony:蔡東豪

Raymond:王健漳

Eddie:譚新強

Charles:羅霈良

【股市預測】

Tony:如何看聯儲局減少買債的決定?
Eddie:(伯南克)好聰明,兩手運作,一手放慢買債,另一方面再加強前瞻指引。原來聯儲局打算在2014年年底開始加息,後來變了用失業率作指標,之前說7%失業率、後來又降低至6.5%,先會諗加息。
今次議息會議再作調節,說失業率跌至6.5%,也不急於加息,等市場繼續有想像空間。一手放,一手緊。每月減少買債,另一手確保所有人認為長遠仍未會加息。所以,好明顯對美國啱啱好,伯南克公佈後,道指及標普指數都創新高。
Tony:我都覺得係,佢事先張揚(減少買債),但又唔係狼來了。

儲局減買債 資金湧股市

Eddie:伯南克誓死說,放慢買債與他退休無關。但當然有關係。格林斯潘在位時,好多人崇拜,但退休後人人當他是過街老鼠,寫書都唔收得,正正因為(金融海嘯)收尾,結局唔好。
伯南克推了QE出來,年中開始談放慢買債,卻因為兩黨預算案爭拗等原因拖延。上一次是他最後一次主持記者會,今次都不放慢買債,伯南克便好像只懂開頭,唔識收尾。做好做醜,都要減買債100億美元,證明有結局。
Charles:其實放慢買債對股市都係好消息,因為是逼債市的錢走出來。QE規模減少皆因經濟開始好,市場會買股票,而且未到息口高,要走貨的階段,股市仍有一段時間升,債券擺到明要賣。
Raymond:每月減少買債100億美元其實好少,可能日後每隔幾個月先減100億美元,每月買債的規模由850億美元減至0,都可以減好耐,等於還有1萬億美元出緊嚟。
而且都未收水,仲未unwind。聯儲局只是減少谷大嘅規模,聯儲局的資產負債表仲膨脹緊。
Tony:如何睇2014年股市?
Eddie:我覺得,依舊會是已發展市場跑贏發展中市場,這個趨勢都好難抵擋。美元偏強,日圓弱,日本應該幾好。主流意見認為,北亞市場如韓國、日本、中國,會較東南亞如印度等佳。
但我覺得未必真,韓國、台灣會幾好。中國一定極差。東南亞尤其是印度,我認為會跑贏中國。大家講到印度經濟不好,錄得經常賬赤字、財政赤字等等。但2014年印度選舉RJP political party(印度人政黨)有可能贏出、印度央行又轉由芝加哥大學教授Raghuram Rajan掌管,信心返晒嚟。
Tony:唔好講咁遠,中國點樣?
Eddie:2014年,中國差不多會是最差,香港都差。我上一次都講,12月大市可能不好,不幸言中。中港股市會繼續underperform,原因是政策就算改革,認真的話,要向銀行、國企開刀,包括拉人、將國企拆細、加入競爭,全部都對銀行、大國企是壞消息,政策改革越要落實,對指數中短線都不好,長線可能會好返啲。
Tony:呢點我同意。三中全會提及的改革,就算做到都要等三、五年。短期一定痛苦。
Charles:技術上看長線睇好。24000點好重要,如果破位上升,氣氛轉變好大,現時太多負面消息。
Eddie:唔係呀,香港現時極樂觀,IPO勁暢旺。
Tony:整體氣氛、零售都樂觀,曹仁超都話(2014年)最高31000點。
Charles:絕對唔係,過去三個月,氣氛曾好到不得了,原因只是衰太耐,但呢班call嘅人不是真正揸錢。講就叻,但我見大市根本無動靜,聯儲局公佈減少買債當日甚至高開低收,大部份揸錢嘅人都係睇住先。2014年大跌機會勁小,大升機會極大。唔會再拖喇。
Raymond:唔係太多人增持股票。2014年唔會大跌。如果股市要大跌,一定要有人增持,同估值過高。都無人增持股票,又何來有人沽。跌嘅空間好少,但東南亞的貨幣因為退市,仲有空間落。所以,北亞市場可能穩陣啲。
Tony:點睇內房、內銀?
Eddie:我又唔夠膽講會大跌,但會不理。睇少樣嘢,無咁麻煩,做吓其他嘢。
Tony:呢兩年,你只是睇行業?
Eddie:當然係asset allocation,早一、兩年,好多債券後來轉咗股票,在股票,就bottom up選股。指數、大國企,銀行一概避免。
Tony:Charles買藍籌多,去年表現是否麻麻?
Charles:係呀買咗,咪坐囉。過去三、四年,指數變動不大,呢啲股係等,畀到息。
Tony:呢三年,大國企盈利不斷咁升,股價無跟住上,估值咪不斷跌?

藍籌有息風險低 繼續坐

Charles:係呀得返5倍(市盈率)。但藍籌股風險小,存款息率咁低,藍籌股收到息,我會坐多一會。
Eddie:你都不知有幾多呆壞賬。所以信達(1359)咁好,炒得咁勁。啲人覺得呆壞賬增長,買信達就是put中國銀行壞賬。
Tony:我buy Charles,PE得5至6倍,收4厘息,我理得你呆壞賬,阿爺實有辦法。
Charles:過去幾年點解咁淡,全因外資大銀行都在亞洲、中國籌錢,賣了好多貨,包括高盛、美銀美林個個攞百幾二百億元走,合共攞幾千億。到佢哋返嚟先會好。
我記得1997年,香港政府救市嘅時候,全世界攞晒啲貨出嚟。到1998至1999年,啲錢返番嚟,個市開始好,邊度有free flow?冇晒,貨全在政府手上,大市嘭一聲乾升一倍,如果政府不推出盈富基金(2800)賣貨,個市仲有得升。
Tony:會唔會再發生呢個情況呢?
Charles:我覺得會。如果美國標普500指數再升兩成,啲人覺得估值與其他市場距離變大,應該會減持美國股市,加番中國及香港,資金流一轉,這個情況可能再發生。
Eddie:我絕對不贊成港股或A股表現差,純粹是現金流的問題。主因是基本因素有問題,中國經濟增長減慢,人口問題不理想、改革政策等對投資者不吸引。其實,去年深圳創業板升得非常多,只是大指數滬綜指、H指、恒指不好。中國有前途,但前途在民企,不是國企。
Tony:中國三中全會的改革,邊一樣行得通。
Eddie:放寬一孩政策肯定是起點,但速度太慢,追唔番人口老化問題。
Charles:最令人眼前一亮是,習近平整個改革得罪好多人,肯得罪咁多人,不是為自己好,就是為整個國家好,我傾向相信是後者。第二點,是改革推到好快,一孩政策、退休福利計劃,IPO改革等。好多改革一早已準備好,之前啲人唔夠膽決定,但現時終於肯推出。

【日本經濟】

Tony:Raymond熟日本,你如何看日本經濟?
Raymond:日圓會跌,越跌對經濟越好,日本出生率最近都回升。這次日本改革,日本人民都覺得轉變,以前的改革,日本人也不信。
Charles:過去整體外圍環境轉好,日本的資金會走出去,因為日圓無息,日圓就會弱;如果外圍風大雨大,錢會返去國家,日圓就強。所以,好環境下,日圓會弱,日股繼續升,氣氛轉好,資金流出就會加大,日圓會繼續弱。
Eddie:大致上贊成,但是否從根本改變,我有點懷疑。現時豐田等日本汽車行業,與通用汽車以及福特等越來越遠,在全世界都不是好賣得。日圓即使跌,出口數字仍不好,根本性改變好難。日圓會續弱,日本股市可能短期內可以炒,但炒幾遠,我真係唔知。

科網熱未完

Tony:上一季科網股好熱。上次講到中國科網行業,Eddie提到,中國科網股有創新,說法好有原創性。以前中國科網公司都是一味抄。
Eddie:上一次話騰訊(700)微信有突破,我過去幾月再做研究,發現另一家韓國公司NHN有一家持有日本即時通訊軟件Line。Line的技術比微信、WhatsApp更好,全球即時通訊軟件的平台,最主要就是這三家。
WhatsApp是一家奇怪的公司,員工得100人,因為行得快,好多人用。但不賣廣告,只是收1蚊美金下載費用或延續服務費用。如果WhatsApp繼續咁clean,會無商業價值,但若然這巨人喚醒了,就好恐怖。
Snapchat也急起直追,剛剛拒絕了facebook的收購。Snapchat兩名20歲出頭的創辦人曾說,無意發展成facebook,以收廣告為主。他們的目標是做增長服務,賣sticker、賣虛擬商品之類,亦有可能發展成網上、網下購物。他們模仿的對象並非Google,也非facebook,而是Line、微信兩家亞洲公司。
雖然很多人用facebook流動版,不過微信、WhatsApp、Line一日用接近廿次,時間長、次數較多,主要連結core of social graph,在同一城市最密切的屋企人、朋友及同事等。即時通訊軟件的品牌廣告潛力,未必及得上facebook,但針對性廣告可能很有效,其商業價值亦可能遠遠大過facebook。
再講增長率,facebook現時有12億人,估計最多全球會有15億人用。微信、Line現時3至4億用戶左右,增長空間起碼有一、兩倍。
外國投資者現時還是對中國科網股有折讓,覺得亞洲人先會買虛擬產品,但其實唔係。好像日本動畫,現時外國人都接受,有朝一日,Line公仔Brown和Cony,可能都會獲外國人接受。即時通訊行業有能力增長成為全球企業,決賽主要睇Line、Whatsapp及微信。
Tony:中國互網聯企業在2014唔會停?
Eddie:唔會,有人估計阿里巴巴上市可能想套現,專注搞電子交易、電子金融。阿里巴巴餘額寶的貨幣基金推出不夠半年,已集資上千億,成為中國國內最大的基金,可能之後就推出債券基金、股票基金,who knows?網上的威力,真係無可抵擋。
Charles:舉例,我肯定銀行最唔鍾意餘額寶。微信打算同銀行做掛鈎,令用戶繼續將啲錢放在銀行,微信幫忙做payment,應該受銀行歡迎。中國推4G,最大得益並非中移動(941)、中電信(728),而是微信、視頻等等,不要忘了中移動有7億至8億客,僅1億多是3G。
Eddie:所以4G令中移動underperform,未來繼續要投資好多錢。
Raymond:大陸科網公司都只是incremental innovation(漸進型創新)。中國科網公司的突破性創新,我睇唔到。但係賺錢不需要突破性創新,主要靠人多,中國科網股又有國家支持,根本谷到肥仔。國家亦有利益,所以有得玩。
Tony: Eddie,你同唔同意中國無創新?
Eddie:睇你講乜創新。我會拗大陸科網公司的商業模式創新,阿里當然似Amazon、eBay,但阿里巴巴做法完全不同,阿里以negative working capital方式營運,令他更賺錢。從商業角度看,肯定是創新,這個不能否定。

【中國半導體冇得追】

Eddie:如果技術層面,中國最落後是半導體,中國貿易逆差最勁是半導體。短期內,中國好難可以追上來,美國、日本兩間龍頭半導體公司講緊合併,將會拋離中國好遠。我最睇好台灣半導體行業。
中國智能電話好多都幫襯台灣。除了半導體之外,其他技術追緊上來,例如品牌包裝都學緊。小米肯定在marketing方面已是相當強的公司。
Tony:即係小米可以成為世界級的公司?
Charles:就算小米唔得,但都會有其他人得,中國咁大個市場,咁多創投基金畀錢,我唔擔心。
中國大部份技術還是追緊世界標準,有得抄點解唔抄,慢慢冇得抄就會有自己的R&D。舉例,全世界最先進的水泥廠技術可能在中國,華為的R&D、專利數目全世界也是名列前茅,所以後面會見得更多創新公司。
Tony:中國比韓國、日本的技術比較係點樣?
Raymond:韓國有好大優勢,例如是記憶體,全世界都差不多要向韓國輸入,但好多尖端物料仍然來自日本。日本基本科學相當強,其他好難追上去,要抄都抄唔到。
Tony:精電(710)超過95%的半導體係同日本買。有啲人會話日本仲有半導體廠。有呀,細細間,但如果佢冧咗,全世界好多嘢死得。

【Bitcoin挑戰法定貨幣不易】

Tony:你哋有冇諗過玩Bitcoin?
Eddie:呢個可能係好多嘢嘅第一步,等於以前的Napster,以點對點方式下載音樂,初時好成功,後來因為版權問題冇咗。但由Napster引伸好多東西出來,有iTunes、Spotify等。
Charles:無仔細研究,但啲人話Bitcoin冇嘢、虛擬,一張紙都是虛擬,美元一樣是虛擬,所以Bitcoin本身是無問題,只要大家接受就得,但最大問題是個發行者。到底點發行?大家是否有信心?
Raymond:我冇畀心機研究,但任何金條、美金,同鑽石都係一個字,信字。你點去信Bitcoin,同你點去信金條,分別太大。
Eddie:Bitcoin最初賣點是驚美國印銀紙,所以設上限,同時好難製造出來。第一代可能純粹是炒。帶出來的電子交易、電子付費等肯定會快速發展。
Tony:Bitcoin最多交易的地方是中國。但貨幣好難,大陸點會容許Bitcoin的交易,貨幣的監管一定好嚴。
Raymond:每個國家有個概念叫法定貨幣,挑戰個monopoly難過登天。

【講者介紹】

譚新強 Eddie
‧中環資產投資行政總裁
‧曾任職AT&T貝爾實驗室、所羅門兄弟、美林、里昂等機構,被喻為亞洲股本衍生工具先鋒。2005年創辦中環資產,2008和2010年被選為亞洲最佳對沖基金。擁有多倫多大學電子工程學士和碩士學位,耶魯大學管理學院公共與私營管理碩士學位

羅霈良Charles
‧海角資產管理投資總監
‧集團管理逾十億元資產,旗下長倉絕對回報中國基金,在過去五年表現勝過97%同類型基金。打滾投資界26年,曾任職德盛安聯、研富資產管理(RCM)。畢業於香港大學,持有港大社會科學(經濟)碩士學位,並擁有CFA資格

王健漳Raymond
‧捷達投資管理董事總經理
‧為機構和高淨值投資者提供另類投資顧問服務,集團旗下基金管理超過8.5億美元資產。
‧畢業於劍橋大學,持有工程學位,並為多倫多大學系統控制碩士,擁有CFA資格

足本收睇《亂噏24》x劉嘉玲; 鄭秀文@杜琪峯再度登場!
周一至周五《亂噏24》約定你: http://bit.ly/appletalk24

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載