› 選擇地區
三藩市
紐約
洛杉磯
其他美國地區
香港 台灣 北美
 
2014年01月06日

中環在線:
八達通頻出事 未揀啱新CEO
張耀堂捱義氣頂多陣 - 李華華

八達通頻頻出事,猶如「燙手山芋」,CEO一職未搵到人接手,張耀堂捱義氣坐多一會。 設計圖片及對白

家陣人人至少有一張八達通,八達通有乜風吹草動,差唔多全港人都關事,近年八達通幾次出事,例如出售客戶私隱獲利、歷年多扣過千萬元,上周又話畀錯優惠巴士乘客,難怪八達通都真係要精挑細選,搵一位相當適合嘅人選做CEO,接替原本今個月退休嘅張耀堂(Sunny),Sunny惟有捱義氣做到3月底。Sunny自言由童工做到花甲之年,佢2011年初加盟八達通,舊年8月宣佈,做到本月初就約滿退休。華華趁住新春,準備約佢老哥餞別,殊不知Sunny嘅退休大計要暫緩至3月底。原因係八達通董事會,仍在物色接任人選中,於是呢位好好先生就捱義氣,遲啲先至展開人生新一頁。

押後旅行大計

押後退休,有冇影響佢嘅旅行大計呢?Sunny笑笑口話,旅行幾時都可以去,最緊要公司人手交接順利。
莫非做八達通舵手呢份工太有「挑戰性」,冇人敢接呢個燙手山芋?Sunny不以為然,佢話呢個市場人才好多,相信董事會一定可以搵到合適人選。
正所謂人揀你,你揀人,八達通係一間受到公眾關注嘅公司,要做佢CEO,除咗有才能,仲要有膊頭,夠膽色,確實唔係咁易搵啱人㗎。Sunny上手陳碧華咪就係因為出售客戶私隱圖利一事被轟走囉!
早前聖誕元旦期間,Sunny亦留港睇住公司,得閒喺山頂跑步,三仔爺仲打網球互揪。賽果係23歲大仔贏佢,佢就贏咗仍在求學嘅19歲細仔。以花甲之齡嚟講,Sunny算贏晒㗎嘞!

李華華
mailto:LiWaWa@AppleDaily.com


有料放?想收料?入嚟【蘋果互動】啦!
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載