› 選擇地區
三藩市
紐約
洛杉磯
其他美國地區
香港 台灣 北美
 
2014年01月21日

中環在線:
陳曦齡老公夠面子 猛人做佈景板 - 李華華

健康產品公司維特健靈噚日喺金鐘一間五星級酒店舉行20周年酒會,雖然董事長兼西醫陳曦齡舊年被裁定專業失德,但同為創辦人、有「富豪御醫」之稱嘅老公謝德富,人面廣兼有號召力,請來多位政商界猛人捧場,甘願做人肉佈景板,包括全國政協副主席董建華、利豐(494)榮譽主席馮國經。
謝德富係著名心臟科醫生,大孖沙李嘉誠、李兆基、鄭裕彤都係佢客人,李嘉誠曾經以「多年朋友」形容兩人關係;董太董趙洪娉2010年率團到廣州考察,謝德富係副團長之一,佢哋應該都幾老友。
富豪界之外,醫管局前主席胡定旭、香港大學醫學院院長梁卓偉、食衞局前局長周一嶽亦有到場,令酒會儼如名醫聚會。飲食界就有「阿一鮑魚」楊貫一、福臨門前老闆「七哥」徐維均,據聞七哥90年曾經同謝德富合作開公司。

馮國經陳裕光讚產品

一眾嘉賓唔止人到,仲做埋人肉宣傳,馮國經旗下利豐自維特健靈創立冇耐已經做佢經銷商,噚日大讚品牌好,楊貫一、七哥阿仔徐德耀,同埋姍姍來遲嘅大家樂(341)主席陳裕光,異口同聲話有服用維特健靈產品,認真唔話得。
被問到公司嘅上市大計,陳曦齡謙稱自己喺金融方面屬門外漢,要諮詢其他董事意見先至可以決定,暫時未有時間表。
佢對於中國發展計劃就肯定得多,「我哋喺香港用咗20年,應該中國只要用10年」。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載