› 選擇地區
三藩市
紐約
洛杉磯
其他美國地區
香港 台灣 北美
 
2014年01月21日

魚樂無窮:金邦達零蟹貨再落鑊 - 唐牛

金邦達係內地唯一同時獲得全球六大發卡商(包括Visa及萬事達卡)認可嘅金融卡製造商。

踏入2014年,每日嘅市況可重覆用以下三句說話總括︰概念股輪流炒、中資股弱到爆、指數窄幅上落。高追變成王道,逆市撈底只會傷上加傷,既然遊戲規則未改,惟有乖乖哋照跟,今日就向強勢半新股埋手。上月初上市嘅半新股金邦達寶嘉(3315),噚日逆市炒高9%,圖表出現破旗格局,收市計更創上市新高,絕對值得望多兩眼。
金邦達主要設計及製造金融卡,包括借記卡、信用卡、記賬卡及社保卡等,另又提供卡片個人化服務及現場發卡系統解決方案,以銷售額計,為大中華區金融卡供應商一哥,認真巴閉!唔單止咁,集團更加係內地唯一同時獲得全球六大發卡商(Visa、萬事達卡、AE、銀聯、JCB及大來)認可嘅金融卡製造商,龍頭地位可謂穩如泰山。隨着內地銀行逐步upgrade各種卡款,金邦達生意絕對唔使憂。公司2012年全年賺1.15億人仔,但舊年上半年已賺8,110萬人仔,相當於前者嘅七成,爆炸力有根有據,仲唔排除有盈喜嘅可能性㖭!
雖然上市後累積升幅逾七成,但已進入零蟹貨區域,加上強者越強嘅市況未改,炒作空間無極限,如此集天時地利人和於一身,每逢回吐都係吸納嘅好時機,短線目標先睇11元。

唐牛

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載