› 選擇地區
三藩市
紐約
洛杉磯
其他美國地區
香港 台灣 北美
 
2014年01月21日

女神tea time:B餐概念股﹖ - Fifi

現時內地嚴禁黨員幹部厚葬,鼓吹節葬,福壽園生意定必受影響。圖為福壽園主席白曉江。 資料圖片

葉朗程上星期嗰篇《BB豬》鴻文,已成功晉身「潮文」系列。基於表面證供,在AB餐之間,後者付出少,收獲多,由finance角度睇,即係毛利率高,揀B餐都係人之常情吧。你揀人時人揀你,講咁耐A餐定B餐,你係咪真係有得揀先?股份就唔同,成千幾隻畀你揀。Magnum(2080)同半新股福壽園(1448)咁多人抽,相信「B餐概念」都係原因之一,兩隻股毛利率高達80%。
Magnum已經講到爛,暫且放埋一邊,反而係上年年底上市嘅殯儀股福壽園,公司管理層借傳媒把口,唱好殯儀業。預期未來行業規模將增加10倍,去到5,000億人仔,未來5年人均銷售額年均增長17%至18%,仲話覺得「殯葬業在中國有得天獨厚的機會」。
講到殯葬業前景一片光明,加埋股價經過一輪浮沉後,噚日福壽園再炒高9%,如在棺材中看見一絲曙光。不過10倍條數點計就冇人知,但菲菲知而家內地嚴禁黨員幹部厚葬,生意冇可能冇影響;當連蘇民峰本書都唔准賣,你就知當局要落力打擊迷信風氣。
睇埋走勢圖,冇錯福壽園係破旗,但成交唔配合,最少要突破5.4元左右先見到有展開升浪機會。
再者,農曆新年就到,迷信的香港股民,正路都唔會擺隻墓地股喺自己過倉砸過年啩。話知你A餐定B餐定C餐,沽咗先算啦。

Fifi
本欄逢周二、四刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載