› 選擇地區
三藩市
紐約
洛杉磯
其他美國地區
香港 台灣 北美
 
2014年01月24日

中環在線:陳小魯簡樸家居曝光
紅二代人脈廣 賀禮堆滿一角 - 李華華

陳小魯住所客廳旁邊擺滿一地別人所送嘅禮物(箭嘴示),可見佢紅二代地位。 本報記者攝

開國元帥陳毅之子陳小魯作風低調,本報記者早前採訪佢,發現佢嘅住所實而不華,招呼人嘅客廳沒有金碧輝煌嘅佈置,但簡單擺兩件估計係根雕嘅擺設,已透出氣派。
安邦保險近年喺內地冒起得相當快,甚至有能力爭購永亨(302),控制人吳小暉係已故領導人鄧小平嘅外孫女婿,陳小魯係董事之一。
陳小魯住喺佢岳父北京嘅舊屋,係北二環附近嘅民房,同好多遊客遊覽嘅南鑼鼓巷只相距幾百米。雖然靠近遊客區,但陳小魯屋企附近十分清幽,事關胡同附近有幾位戴住紅袖章嘅街道辦睇場,遊客見到咁嘅陣容,都知住喺呢帶嘅人非富則貴,甚少走近。

客廳較細 根雕擺設裝飾

陳宅入面有個小池塘,步入臘月已經結冰,幾棵樹亦迎冬而枯,陳小魯就住喺兩層高嘅樓房,驟眼望入屋,有好多間房,客廳較細,牆上掛上一幅老虎頭嘅畫,中間擺咗兩件應該係根雕嘅擺設,仲有一嚿奇石。
細心睇,旁邊擺滿一地應該係別人送去嘅禮物,估計係新年前後,別人嘅一點心意,亦反映陳小魯呢位紅二代嘅地位。客廳掛有一幅全家福照片,陳小魯同太太粟惠寧,與家人聚首一堂。粟惠寧係開國十大將之首粟裕個女,粟惠寧個姪仔粟志軍跟國家主席習近平亦有交情。採訪當日,粟惠寧不在家,因佢厭倦寒冬,飛咗去海南島避寒。
雖有不平凡嘅背景,但陳小魯對人親切,若非佢有架車掛上軍委總參謀長先有嘅VA車牌,陳小魯跟尋常老人家冇乜分別。

李華華
mailto:LiWaWa@AppleDaily.com

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載