蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年01月29日

抗拒做風頭躉 擔心家族爭產
呂志和:大富未必安樂

【專訪】
過去屬於低調富豪,近年卻被迫高調。銀娛(027)及嘉華(173)主席呂志和,乘賭股狂潮,身家暴漲,引人矚目。但名太響、錢太多,卻為呂志和帶來更多煩惱。他怕做「風頭躉」,又擔心家族爭產,認為小富小貴已經足夠,大富大貴未必最安樂。
記者:吳永強 孔雪茵 林幗欣
攝影:易仰民 部份相片由被訪者提供

相關新聞:未言退休 最怕無所事事

根據2014年《福布斯》香港富豪榜,呂志和的身家已暴漲至210億美元(約1,634億港元),僅次於「亞洲首富」、長實(001)主席李嘉誠。最近彭博富豪榜的一時烏龍,更造就呂志和做過半日「首富」。惟呂志和對「首富」的寶座卻並不受落,對於成為眾人焦點就更加「怕怕」,「呢啲係你哋(傳媒)曳之嘛,唔關我事呀真係,所以我都話你哋曳,得閒幫我寫咁鬼多嘢」!

得到金錢 失去自由

由富豪再進一步變成超級富豪,身家上的數字遊戲,反而為呂志和帶來不勝煩惱。得到更多金錢,同時卻失去更多自由。「你去到即係所謂大富大貴,成日身不由主,平常嘅人最安樂。係咪呀?我都情願好似舊時咁,得閒就湊吓啲仔女去吓旅行、游吓水,咁就最開心。又冇人睇我。你𠵱家出到嚟,個個啄鬼住你,煩呀」!
雖然身不由己,但總算為家族建立生意王國。已過杖朝之年的呂志和前年亦公佈「分身家」大計,準備交由第二代接棒。當中近年「火熱」的澳門賭業交長子呂耀東「打骰」,次子呂耀南負責美國酒店地產業務,中港地產由三子呂耀華掌舵。長女呂慧瑜將會負責本地酒店業務,幼女呂慧玲主管行政工作。
對於第二代的工作表現,作為父親的呂志和亦老懷安慰,「個個都好聽話好做嘢囉」。雖然「接班人」已漸有成績,惟呂志和卻似乎未放心全身而退,「唔係放心嘅問題,佢哋係識做,佢哋做錯咗又點啫?我話你做啱咗又點啫?……我啲仔女都唔知幾歡喜,我𠵱家返去搵對眼瞪吓佢,睇吓佢,佢哋就仲歡喜」。
放不下的,除了一盤生意,更可能是自己控制不到的事件。雖然呂志和曾提到,「自己錢唔係咁多……爭產問題在本港屬少數情況」。但兄弟鬩牆,上演爭產鬧劇,彷彿是大家族鐵定的歷史宿命。呂志和儘管口裏說着不擔心,惟對於未能掌握的事,他亦不敢說得太死,「呢啲你唔好講呀,個個家庭都有呢個問題,係唔係?啱唔啱?……我都話有錢就越要傷腦筋,越冇錢就唔使傷腦筋。真㗎,我有錢嘅親戚又有,冇錢嘅親戚又有,我認為最幸運係冇錢嗰個」!

相關新聞:無後悔遲發展地產

無懼死亡 看得豁達

在商場過慣風雨飄搖的日子,看盡多少大風浪,就算面對人生的大限,呂志和不但不避諱,反而比平常人看得更豁達、更淡然,「驚唔驚死?哎,死就最好喎,安安樂樂,可以瞓覺,始終都要瞓覺。唔好睇得咁重,始終都要瞓覺」。
活到八十五歲,呂志和亦自覺人生無憾事,認為實事求是,盡力完成已於願足矣,「你做100年、1,000年、10,000年都做唔晒啲嘢,做又係自己心意,能夠做得到幾多咪做囉,做唔到都盡咗自己能力,唔需要怨自己㗎!」

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載