蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年03月25日
馬上成為壹會員

中門大開:在食撻表象背後 - 添馬男

港人懷念彭定康(右),並非戀殖親英,只是捨不得一個充滿改革熱情、充滿希望的年代。

肥彭來港竟然有近百人往機場接機,佢二十年前出任港督,香港人長情?非也,不過是借擁肥彭來顯示目前深紅政客當特首之不堪,今不如昔,順手刺激一下左派及北京官員。其實無論係反彭或擁彭者,都未有認真睜開眼睇清楚1992至1997年彭治時代對香港本土政治現代化影響,大家焦點不外乎他英國政客風采或在政改問題上同北京對着幹,激到北京扎扎跳。

冇肥彭改革 香港淪落更甚

當年臨別,司徒華送了一塊書法牌匾予肥彭,上書「千古醉人」,既食「千古罪人」字,也反映華叔對佢欣賞。肥彭親民去泰昌食蛋撻、飲涼茶、小狗及千金們八卦新聞,都只係表面那一「浸」。
佢真正貢獻係將殖民地官僚政治引入「現代性」(modernity)。現代性是講求透明度、公平、公正、問責,如果冇肥彭七年內政改革,今日香港淪落至更加不堪情況。
舊殖民地官僚問責性及透明度低,肥彭來到第一樣就係推動citizen's charter,後改為「服務承諾」,即每個同市民有接觸之執行部門,要公開承諾處理市民個案所需時間,唔好睇少呢種行政改革,係一個大工程。第二步係借營運基金控制官僚膨脹,部門訂下目標回報率,作為衝量指標,令部門首長要有成本控制意識。第三步係佢自己帶頭推動問責性,今日特區空有問責制之名,但實質用盡各種方法迴避向立法會及公眾問責。當年肥彭首創總督答問大會,唔單止定期落立法局答問,也在施政報告之後落大會堂直接接受市民質詢。另外又提拔一班青壯政務官,如林煥光、林鄭月娥、羅范椒芬,鼓勵佢哋走出去,落立法局,去公開論壇,出席政黨活動。
肥彭在政治上提高三級議會作為民意代表及問責之地位,而九七後北京卻不斷削弱立法會監督職能,引入分組點票,比例代表制,主動製造議會分裂及黨派林立,誰也不服誰,處處設防。香港政治陷入大敗局,正正就係因為政制發展冇方向,一切以互相監視、互相制約為主導思想,將大小權力分割。
北京正因為無法子走出彭定康夢魘,九七後用全力清洗彭定康「餘毒」,結果特區十多年來政治體制徘徊不前。
九七後兩大政治改變,一是老董殺死了民選市政局,製造了超級官僚機構康文及食環署,而承諾之權力下放至區議會根本從未實行。二是搞問責制,反過來向政務官奪權,自己製造內部矛盾,但問責制又冇普選及正規政黨政治作配合,搞出一棚古靈精怪虛有問責之名而無問責之實嘅所謂司局級官員。
撫今追昔,肥彭七年改革成果遠超九七後十六年失敗管治,盲頭烏蠅式亂搞一通。懷念彭定康,並非戀殖親英,而是懷念一個充滿改革熱情、充滿希望嘅年代!

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載