› 選擇地區
三藩市
紐約
洛杉磯
其他美國地區
香港 台灣 北美
 
2014年04月08日

中門大開:國際唱衰策略 - 添馬男

泛民及本土派大可在國際輿論層面唱衰梁振英,阻止特區極左政治鬥爭路線繼續橫行。

馬丁陳太北美唱衰共產黨之行,已經引起美國媒體關注,其實香港已經淡出國際視野好耐,今次美國出到副總統拜登,從政治姿態而言,係要向北京顯顯顏色,如果美國真係重新啟動《香港關係法》,國會關注香港自治地位變化,咁就有嘢睇,美國九十年代關心香港事務者,好似波洛茜議員,今日已是奧巴馬倚重之黨友重臣,北京肯定會重炮攻擊馬丁及陳太,但後果就會適得其反,令美國在香港事務上採取更主動。

極左路線有破壞冇建設

近兩年北京對港政策全線左轉,強硬鷹派主導,一改老董下台後和風細雨方式,有恃無恐,噏得出就噏,完全不顧政治後果,當香港人冇到,好似被林鄭逢迎為「一錘定音」之饒戈平,竟然狂言將內地國家安全法例引申至香港,咁搞法北京任何睇唔順眼之事,都可以直接為香港立法,咁咪就係一國一制囉,呢種極左言論,對政改大局只有破壞而冇建設可言,你話國際社會點睇香港自治前景。兩年前夾硬捧上深紅特首梁振英,已經觸動香港人對「赤化」之恐懼。當時幕後為梁上位拉線,向中央力sell之人,包括董建華,有否諗過後果?現時終於逐步浮現,真正現眼報。
赤化恐懼令本土意識迅速抬頭,首當其衝是國教,梁振英當選第一波大規模上街抗爭就係反國教,大家唔好睇小梁當選、赤化恐懼與反國教運動對台灣學運影響,所謂「香港今日、台灣明日」,論述由此而起。跟手旺旺集團被視為紅色同路人,入侵台灣媒體,收購中時及中天有線電視,林飛帆發起反媒體巨獸運動,學運再起,背後同樣係來自「赤的恐懼」,到反服貿佔領立院,赤的恐懼及近兩年香港極左風所產生嘅示範效應,正式影響到台灣本土民情輿情。
為咗支撐一個冇民望嘅特首,不惜用各種手法粗暴整治香港傳媒,向鍾庭耀作文革式批鬥,喺香港挑起大小政治鬥爭火頭,以為大權在握就可以為所欲為,置北京及香港長期利益不顧。呢種極左鬥爭思維,為中國毀滅高度自治提供好好嘅證據,台灣、美國主流媒體會認為係北京有意加強操控而夾硬嚟。
如果我係泛民及本土派,就會「加大力度」,在國際及台灣輿論層面唱衰梁振英,凸顯香港高度自治正面臨嚴重威脅,以阻止特區極左政治鬥爭路線繼續橫行!

添馬男

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載