› 選擇地區
三藩市
紐約
洛杉磯
其他美國地區
香港 台灣 北美
 
2014年04月08日

金手指:同共產政權對賭 - 孫柏文

筆者認為,若內地的信貸系統不改革,會有崩潰的危機。 資料圖片

近期孫柏文不斷寫關於大陸嚟緊嘅信貸危機。兩周前我直情話而家對大陸情況嘅感覺,有如喺2007年我對花旗國咁。點知我講完冇耐,前宗主國保守黨黨報《每日電訊報》,就登咗篇話大陸唔掂、香港都會揩嘢嘅文。當然,有好多人都唔同意我嘅講法,有啲甚至係本版金手指嘅鄰居,仲要係我非常尊敬嘅前輩!但數就係數,成個信貸系統呢五年放幾十萬億元出去,要冇事就要睇究竟條數有冇得還。如果冇,邊個要食咗條數。

若不改革系統將崩潰

近五年大陸銀行放咗出去嘅債由9萬億美元升到24萬億美元。新放嘅15萬億美元有幾多?係大陸國民生產總值嘅170%。條數仲未計地區政府債同信託產品影子銀行系統多咗嘅債。大家都知經濟增長大陸冠全球,但咁樣貸款出去點會冇呢個打類固醇式嘅增長?多唔使講,如中央最高領導覺得咁嘅信貸增長係冇事,咁又點解唔一切照舊,年年袋7.5增長呢?
中央最高領導,唔同香港啲本地官員同陀地反對派,睇外國例子時會睇埋前因後果。對中央有最深遠影響嘅case studies,就係50至80年代嘅蘇聯、80年代嘅日本同埋90年代嘅印尼。呢三個地方喺嗰啲時段,都曾經俾啲低水準傳媒講到會領導世界,同今日嘅大陸一樣。佢哋當年爆煲出事前就算有人話暴風雨嚟緊,都有好多德高望重嘅人話杞人憂天。但原來呢三個case studies就有一項數據,我國中央領導係深信解釋點解最尾三個地方都出事。呢個數據就係資本回報率return on capital,即係每掟一蚊出去投資會有幾多實際回報。
原來嗰三個地方啲領導,當年一路睇住每掟一蚊出去嘅投資,回報越來越少嘅情況下都唔改革,一切照舊。到最尾就成個系統崩潰,政權倒台。所以一切照舊結束,如你仲喺到賭中央學以前咁救市所以買定中國建材(3323),我只可以話你就係同共產黨政權自我救亡行動對賭。

孫柏文 獨立股評人
http://facebook.com/shuen
本欄逢周二刊出

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載